Dabawenyos namalandong atol sa Mercy and Mary Retreat

Nagkatigum ang mikabat sa kapin kon kulang 2,500 ka mga magtotoong Katoliko ilabina ang mga Marian Devotees nga gikan sa Diocese sa Digos, Tagum, Mati ug Archdiocese sa Davao sa gipahigayong Mercy and Mary Retreat sa Ateneo de Davao University niadtong Hulyo 23 hantod 25 niining tuig. Ang maong aktibidad hugot bakos nga gisuportahan sa mga Obispo nga sila si Bishop Guillermo Afable sa Digos, Bishop Abel Apigo sa Diocese sa Mati, Bishop Emeritus Fernando Capalla, Bishop George Rimando, mao ang Auxiliary Bishop ug Archbishop Romulo Valles ang arsobispo sa Archdiocese sa Davao ug mao usab ang Presidente sa Catholic Bishops Conference of the Philippines, ug ang mga kaparian gikan sa nahisgutang mga Dioceses. Nahimong dinapit nga mamumulong sa maong aktibidad mao si Fr. Michael Gaitley, MIC, usa ka tagasuwat ug libro, kinsa midasig sa mga delegado sa ilang pagtoo sa Ginoo ingon man kang Birheng Maria.

Usa sa mga gikabutyag sa maong pari nga maayo nga mosalig ang tanan sa Labawng Makagagahom, maningkamot usab kutob sa makaya, ug mamahimong ilhon ang mga kakulangan sa kinabuhi aron masinati ug makaambit sa kalooy ug gugma sa Dios. Samtang mibutyag si Bishop George Rimando, ang Auxiliary Bishop sa Archdiocese sa Davao nga ang maong aktibidad dakong tabang sa mga magtotoo aron mapalawom ang relasyon ngadto sa Dios, pinaagi sa inahanon nga pagpangga ug pagtagad sa Mahal nga Birheng Maria, sumala pa nga gipaningkamotan gayod ni Archbishop Romulo Valles nga ma-imbita si Fr. Gaitley aron mamahimong speaker alang sa mga magtotoo sa DADITAMA, samtang siya mibutyag nga malipayon siya tungod dili ikalalis nga gikan mismo sa nahimong taho sa mga misalmot sa aktibidad nga nahimo kining positibo alang kanila, ingon man na bag-o na sab ang ilang relasyon sa Ginoo ilabina ang pagkamaloloy-on niini inubanan sa panabang ug pag-ampo ni Birheng Maria.

Samtang ang mga delegado, gawas nga nakadawat sa bulawanong pulong gikan kang Fr. Gaitley, nakadala sab sila ug regalo nga usa ka libro nga mao ang “33 Days to Morning Glory, a Do-it-yourself Retreat in Preparation for Marian Consecration” nga mismo ang nahimong tagsuwat mao ang nahisgutan nga pari.