Bayanihan sa Lapanday gipahigayon

Ang barangay Tigatto usa kini ka barangay nga nahisakop sa Buhangin district diin kanunay nakasinati og baha ang mga lumulupyo kung mag ulan. Bisan dili kaayo kusog ang ulan mabahaan gihapon ang maong barangay diin daghang Gagmay’ng Kristohanong Katilingban (GKK) ang nahimutang sa barangay Tigatto. Usa kini ang Sto. Niño GKK. Dili lang sa kakusog sa ulan ang hinungdan sa maong baha kundili ang mga basura nga gilabay sa mga iresponsable nga mga katawhan diin mosulod sa culvert tungod sa ka gamay sa gidak-on sa mga drainage nga maoy usa sa hinungdan sa lunop.

Tungod niini nagkahiusa nga mag bayanihan kon community service ang mga residente sa Purok 9, Km. 11, Lapanday, Barangay Tigatto aron sulbaron ang problema sa pagbaha sa maong lugar pinaagi sa paglimpyo sa kanal. Gipahigayon ang maong kalihukan kaniadtong Dominggo, Hunyo 17, 2018.

Nanghinaut ang mga GKK Servant Leaders ug mga miembro sa katilingban sa Sto. Niño, Lapanday nga unta magbaton og disiplina ang mga lumulupyo sa paglabay sa mga basura ug buhatan og dakong drainage ilabina sa mga balay patigayon nga nagtukod sa maong lugar aron malikayan ang mga sakuna nga panghitabo sama sa lunop o baha sa barangay Lapanday, Tigatto aron tungod niini mahapsay ang panimuyo sa mga katawhan.

Kini usab gipanghinautan sa mga residente sa maong lugar nga bisitahon ug tagaan og pagtagad sa mga bag-ong napili nga mga Barangay Officials nga milingkod sa katungdanan sa barangay Tigatto ug maaksyunan sa hinanaling panahon aron sa pagsulbad sa kasamtangang problema sa lugar. (Arsenio Hinampas Berdera, Jr., GKK SoCCom | Photos by JB Berdera)