Paglaum: Human sa Kinabuhi sa Yuta

Solemnidad sa Lawas ug Dugo ni Kristo
Exodo 24:3-8 / Hebreo 9:11-15 / Markos 14:12-16, 22-26

Ang Dios, miabot sa kalibutan, nga nagsapot sa pagka-ordinaryo, tungod kay ang atong pagkatawo, huyang ra kayo nga sa ingon dili gayud makasabut sa unsa kaanindot sa langitnong mga kamatuoran. Busa sa diha nga si Jesus nagpakatawo, ang Anak sa Dios miabot isip tawo, adunay lawas ug dugo, tawo gayud sa matuod nga paagi, aron atong makita, mahikap ug madungog. Aron magpabilin siya uban kanato ug makig-uban kanato sa atong pagpanaw padulong sa iyang matuod nga puloy-anan nga iyang gigikanan nga mao usab ang atong tinuod nga puluy-anan, siya nahimong tawo. Mipili si Jesus sa usa ka labing ordinaryong porma — pan ug bino — kalan-on nga makabusog ug makahatag sa kinabuhi. Ang Dios nakiglambigit kanato pinaagi sa usa ka panimpalad diin mangita og makaplagan siya dili pinaagi sa paghangad sa langit kondili sa paglantaw diha sa nagpalibot kanato…diha sa pagka-ordinaryo sa atong pang-adlaw-adlaw nga kinabuhi.

Ang Eukaristiya nagpunting kanato sa pagpangita sa Dios, diha sa atong relasyon sa usag-usa, sa atong pagpaningkamot nga magkahiusa; diha usab sa atong pag-alima sa kabuhatan, samtang atong gibuhat ang pagka-magbalantay sa kamugnaan. Hinay-hinay kitang mosulod ngadto sa pagpakighiusa kaniya, kinsa mohatag kanato sa paglaum mahitungod sa atong padulngan nga mao ang langit. Ang Eukaristiya usa ka sagradong panghitabo, usa ka gasa nianang ‘gutloa ug lugara’, diin atong masinati ang mapasayloong Jesus, “dinhi ug karon” ug ang makaluluwas nga Jesus sa kinabuhi human sa kamatayon. Mao kini ang dili matukib nga gahom sa Eukaristiya diin ang walay katapusang kinabuhi mahimong tinuod ug ang iyang saad nga gugma ug kaluoy mahitabo. Ablihan nato ang atong mga mata sa pagtuo, aron masabtan ug aron mabuhat nato ang dakung pagpasalamat nga mao ang tumong sa Eukaristiya. (Sr. Rica G. Dalaguit, FSP)