Mary Help of Christians Parish Fiesta gisaulog!

Mayo 23, 2018 — Mao ang bespiras sa kapistahan sa Mary Help of Christians Parish. Pagka-adlaw adunay gipahigayon nga volleyball para sa mga pangulo. Gilambigitan kini sa 9 ka Zona nga nahisakop sa parokya. Nalipay gayod pag-ayo ang mga pangulo nga miapil sa maong dula.

Sa alas 4 sa hapon nagpahigayon ug Santos nga Misa nga gipangulohan sa usa ka pari nga gikan pa gayod sa Bohol nga si Rev. Fr. Terry Tapay. Napuno gayod ang parokya tungod sa kadaghan sa mga tawo nga mitambong sa misa.

Pagkagabii adunay nahitabong mga pasundayag ug klase-klaseng presentasyon. Gipangulohan kini sa mga Formators. Ang matag Zona nag-andam ug duha ka presentasyon. Daghan kaayong mga tawo ang nalingaw sa mga maanindot nga mga pasundayag.

Niabot na ang adlaw ug malipayong gisaulog sa Mary Help of Christians Parish ang ika 11th nga Parochial Fiesta kadtong Mayo 24, 2018. Adunay gipahigayon nga prusisyon sa mga santos nga nahisakop sa maong parokya. Giprusisyon usab ang imahen sa ilang patron, Maria Mananabang sa mga Kristyanos, ug sa ilang founder St. John Bosco.

Daghan gayod ang katawhan nga miapil sa prusisyon. Pagkahuman sa prusisyon, misunod dayon ang Santos nga Misa nga gipangulohan ni Most. Bishop Jorge Rimando D.D. Inubanan sa kura paruko nga si Rev. Fr. Marcelino Benabaye SDB. Mitambong usab ang mga salesianong mga pari ug ang mga kaparian sa Archdiocese sa Davao. Pagkahuman sa Misa gisunod ang blessing sa prayer of the Holy Family ug ang estatwa ni St. John Bosco nga gipahimutang sa gawas sa simbahan.

Ang mga miyembro sa matag Zona adunay giandam nga gamay nga salo-salo para sa paniudto. Ang mga bisita usab nga gilangkuban sa mga pari ug mga sponsors giandaman usab sa parokya ug mga lamiang pagkaon.

Sa pagkahapon adunay nahitabong Quiz Bee alang sa mga pangulo sa matag Zona. Midaog gayod niini ang Zone 1-B nga gilangkuban sa San Vicente Ferrer Purok 5, Inahan sa Kanunayng Panabang (ISKP) Monteverde ug Sr. Sto. Niño Purok 8. (Jeffrey Bolasa Mondejar, Jr. | Parish Soccom)