Madre nadisgrasya, Padayong nagpaalim

Aron adunay mga espesyalista nga mo hiling sa ilang gipangbati sa lawas, gidala na sa balay tambalanan sa Dakbayan sa Davao ang lima ka mga madre nga myembro sa Dominican Sisters of Pompei, kinsa mga nadisgrasya sa Hinayhayan, Bacolod, Cagwait, Surigao Del Sur, alas sinko sa hapon niadtung Hunyo 13, 2018.

Nahibaloan nga ang mga biktima sakay sa van nga gimaneho ni Sister Lydia Alparos, Superior sa maong Congregasyon, gikan sa Lianga, Surigao Del Sur padulong sa Tandag City sa mao ra usab nga Probinsya, aron mohimamat sa pag-abot sa bag-ong Obispo sa Diocese sa Tandag nga si Bishop Raul Bautista Dael, DD.

Sumala sa nahimong saysay sa usa sa mga biktima, atol sa atong pakighinabi kaniya, kinsa wala na magpapubliko sa iyang pangalan, nga samtang gilatas nila ang kadalanan, apan pag-abot sa naasuy nga lugar, ilabi na sa patangason nga bahin, wala na mi-andar ang makina, ug aduna siyay nakita nga pag-aso sa atubangan nga bahin sa sakyanan, ilabi na ang anaa sa manobela, ug kalit na lamang kining mi-atras, nga misangpot sa pagkahagbong nila sa habog nga pangpang.

Niadtong gidala pa ang mga biktima sa Adela Sera Ty Memorial Medical Center sa Tandag City, Surigao Del Sur, nagsingabot ang mga madre nga gikan sa nagkadaiyang Congregasyon, sama na lamang sa Living the Gospel Community, Dominican Sisters of the Trinity, Missionary Sisters of Mary ug Missionary Benedictine of Tutzing, diin maoy nag atiman sa mga biktima ilabi na sa pagpakaon ug paghatag ug suporta.

Samtang mibisita sab sa mga biktima si Bishop Emiritus Nereo Odchimar, kuyog ang pipila ka mga pari sa Diocese sa Tandag, diin tagsa-tagsa nga nangumusta sa mga biktima sa ilang mga kahimtang.

Samtang gikabutyag ni Sister Nichole Garcia, OSB kinsa mao ang presidente sa Sisters Association of Tandag, nga mapadayun ang ilang pagsuporta ingon man pagtabang sa mga biktima, ilabina nga magpabilin silang maghiusa, aron maghatag ug kusog sa matag-usa.

“We continue to live as one in our diversity being a presence for each other and strength,” sigun ni Sister Nichole Garcia.