Katambayayong sa Kaparian, gipadala

101 ka Extraordinary Minister of Holy Communion (EMC) sa Sto. Rosario Parish of Toril ang gipadala o gi-send forth atol sa 8AM nga misa, June 10, 2018.

Gibasa ni Fr. Roy Mejias ang certificate of appointment nga pinirmahan ni Archbishop Romulo G. Valles, D.D. atol sa pagpadala kanila. Ang EMC mamahimong katambayayong sa pari sa pagpakalawat.

Usa ka tuig ang ilang appointment ug mamahimo lamang sila nga magpakalawat sa lugar nga sakop sa Sto Rosario Parish. Kining buluhaton kinahanglan nahasubay sa norms ug regulations sa Church Law.

“Nalipay ako nga makatabang sa pagpakalawat panahon sa misa ug mamahimo usab nga mopakalawat sa mga masakiton nga dili makaadto sa simbahan,” sumala ni Bro. Teodoro Ardepolla.

“Panata nako nga magmaluntaron ako sa pag-alagad sa Ginoo, nga luyo sa mga pagsulay, ako magpabilin nga EMC,” matud ni Bro. Antonio Lawoglawog, 32 ka tuig isip EMC.

Naghangyo si Bro. Monico Galleros, chairman sa EMC sa commitment, disiplina ug determinasyon sa matag EMC ug sa pagsunod sa schedule nga gihatag kanila. (Joy Ardepolla)