BISHOP MEDIL: Dili lang “Native Priest” apan “Native Bishop” sa Tagum

Sisenta anyos gikan sa pag-abot sa mga Misyonaryo sa Catholic Foreign Mission Society kon mga Misyonaryong Maryknoll, ug mga 30 anyos human mibiya sa Tagum ang katapusang Maryknoll nga pari, si Most Rev. Medil S. Aseo giordinahan sa Hunyo 20, 2018, dili lamang isip “native priest”, apan “native bishop“ sa Diyosesis sa Tagum.

Tuig 1958 miabot ang mga Maryknoll gikan sa Laguna aron pagtubag sa pagdapit ni kanhing Most Rev. Clovis Thibault, PME, DD, nga niadtong tungora Obispo sa Davao City, nga atimanon ang mga parokya sa amihanang parte sa wala pa mabahing Lalawigan sa Davao. Subay sa lima ka katuyoan sa ilang misyon, gipasabot nila ang katawhan sa kasamtangang mga Diyosesis sa Tagum ug Mati nga kay misyonero, ang mga paring Maryknoll dili magpermanente sa dapit. Busa, nag-una sa ilang misyon ang pag-umol og tumandok nga mga pari nga mopadayon pagpalambo ug pagpabarug sa Simbahan sa maong dapit ilabina kay ang Ikaduhang Konsilyo sa Batikano (Vat. 2, 1962 – 65) nagadasig sa pagbag-o pinaagi sa diwa sa co-participation ug co-responsibility.

Natawo ug midako sa Maniki, Kapalong, Davao del Norte, si Bishop Medil usa sa mga unang siyam ka estudyanteng first year high school nga misulod sa Queen of Apostles Seminary (QAS) niadtong 1967 samtang diha mag-eskwela sa kaniadto St. Mary’s High School – Boys Department (karon Letran de Davao of Tagum). Didto siya nag-kolehiyo sa St. Francis Xavier College Seminary sa Davao City, nag- teolohiya sa St. Francis Regional Seminary, ug giordinahan ni Bishop Joseph William M. Regan, MM, DD niadtong 1980. Duna pod siya’y MA in Pastoral Ministry gikan sa Ateneo de Manila ug Diploma in Family Counselling gikan sa Center for Family Ministries (CEFAM), nga programa gihapon sa mga Heswita sa Quezon City. Niadtong 2008, miboluntaryo siya pag-training sa Galilee Center, usa ka institusyon didto sa Tagaytay City alang sa on-going formation sa mga pari, ug nahimong staff niini hangtud 2014. Gawas sa iyang mga parish assignment sa ubay-ubay nga mga parokya sa Diyosesis sa Tagum, lakip didto sa Davao Oriental sa wala pa kini mahimong diyosesis, nahimo sab siyang Procurator sa Queen of Apostles College Seminary (QACS) ug nagmisyon sa England ug Amerika. Matod ni Bishop Medil, dako sab ang natabang kaniya nga sa bata pa siya, giuban-uban siya sa iyang lola pag-apil sa mga buluhaton sa Barangay sang Birhen.

Dili kay karon lang gitanyagan si Bishop Medil sa pagka-obispo. Apan, ning higayona, misugot siya dinasig sa tambag sa Obispo sa iyang gialagarang diyosesis sa Pennsylvania, USA sa pag-“differentiate human fear from the call of God” (Ilha ang panaglahi sa tawhanong kahadlok ug tawag sa Dios). Busa, naningkamot siya pagtuman sa kabubut-on sa Dios pinaagi sa pagtuman sa sugo sa Santo Papa. Ang pagtuman sa kabubut-on sa Ginoo, makahatag og kalinaw ug kalipay. Mao nga ang iyang motto mao ang, “Gaudium in obedientia” – Adunay kalipay diha sa pagkamatinumanon.

Miangkon nga dakung kabahin ang mga Paring Maryknoll sa iyang pagka-pari ug pagka-obispo, nahimo niyang panig-ingnan si Bishop Regan sa pag-atiman sa seminaryo, kaparian, relihiyoso, ug mga layko ug ang ilang mapadayonong pag-umol; ug mas makanunayong pagpakig-uban sa katawhan. Ipadayon usab niya pagpalambo ang mga nasugdan na sa iyang mga gisundan. Diha sa pagpakighinabi kaniya alang niini nga isyu sa Davao Catholic Herald, ang Obispo mipadayag nga huptan niya ang pagka-makiangayon, pagtahud sa katungod sa katawhan ug lumilihok sa Simbahan, ug pagka-matinud-anon ug yano sa pag-alagad alang sa kaayohan sa tanan.

Si Bishop Medil maoy ikaupat nga Obispo gikan sa Diyosesis sa Tagum, lakip na ang anhing Bishop Generoso Camiña, PME (Society of Foreign Missions), nga nahimong Obispo sa Diyosesis sa Digos. Ang laing duha mao sila si Archbishop Romulo Valles, nga karon arsobispo sa Davao ug presidente sa Catholic Bishops Conference of the Philippines (CBCP ug Bishop George Rimando, Auxiliary Bishop sa Davao. Ikaupat usab siya nga Obispo sa diyosesis. Ang laing tulo mao sila si Bishop Regan sa prelatura pa ang Tagm (1962 – 1980), Bishop Pedro Dean (1980 – 1986) nga nahimong arsobispo sa Palo, Leyte, ug si Bishop Wilfredo Manlapaz (1986 – 2018) nga midumala sa Diyosesis sa Tagum isip administrador taghuwat sa ordinasyon ug instolasyon sa bag-ong Obispo. Si Bishop Dean duna say auxiliary bishop nga si Bishop Ramon Villena.

Malipayon usab nga naghinumdum ug nagsangpit si Bishop Medil sa iyang mga klasmeyt sama, nilang Rev. Fr. Ulysses Perandos, ang kasamtangang Vicar General sa diyosesis ug Rev. Fr. Felix Labor.

Samtang nagkadaiya ang mga pagbati sa wala damhang pagka-obispo ni Bishop Medil ug pagtahas kaniya isip Amahan sa Pagtoo sa mga Katoliko sa mismo niyang diyosesis, ang tanan sa Diyosesis sa Tagum nanag-ampo alang sa lain na pod nga hugna sa mabungahong pagpuyo sa Kristohanong kinabuhi isip usa ka Simbahannong Katilingban. (Cynthia N. Masinaring | Diocese of Tagum)