Adlawng Natawhan ni Bishop Abel Apigo Gisaulog

Si Bp. Abel Apigo and bag-ong Obispo sa Diocese sa Mati nagsaulog sa iyang ika-50 ka tuig nga anibersaryo sa iyang adlaw nga natawhan sa Mayo 21, 2018. Sa San Nicolas de Tolentino Mati Cathedral nahitabo and Misa Pasalamat sa alas 4:00 sa hapon ug kini iyang gidumala kauban si Bishop Emeritus Patricio Alo ug mga pari sa Diocese sa Mati.

Puno sa pagpasalamat sa Ginoo ang mensahe ni Bp. Abel tungod sa mga mahinungdanong panghitabo sa iyang kinabuhi sa bulan sa Abril. Kini sa Abril 24, 2018 diin gi-ordinahan siya isip Obispo ug sa Abril 25, 2018 nahitabo ang iyang installation isip bag-ong Obispo sa Diocese sa Mati.

Gisaulog usab niya ang “Golden Birthday Celebration” nga puno sa kalipay og pagpasalamat kay miduyog kaniya ang iyang pamilya, nga higala gikan sa REMASE og ang bag-o niyang pamilya ang katawhan sa Dios sa Mati.

Gipadayon ang kasaulogan sa St. John of the Cross Clergy Compound diin ang mga pari ug ubang bisita nagsul-ob ug “cowboy attire” diha sa ilang pagsayaw og awit pahalipay sa mga nitambong sa maong okasyon hilabi ngadto kang Bp. Abel ug sa iyang pamilya. Nalantawan ang halandumong kinabuhi ni Bp. Abel sa dihang gipakita pinaagi sa “throwback memory slide” gikan pa sa iyang pagkabatan-on hangtod sa iyang ordinasyon og installation isip Obispo.

Ang pamilya og kapamilyang higala ni Bp. Abel nagpabati sa ilang kahingawa ug kamingaw apan puno sa pasalamat sa mga tawo sa Mati sa ilang maikagong pagdawat ni Bishop isip haligi sa simbahan sa Diocese sa Mati.

Mipasalig usab ang mga haligi sa panggamhanan (City and Province) sa ilang suporta ngadto kang Bp. Abel.

Ang bulawanong tingog ni Bishop Abel Apigo walay puas sa pagbalik-balik sa paglitok sa pulong: Salamat! Salamat! Salamat! (Linda Mahumot)