Pre-fiesta assembly sa GKK malampusong napahigayon

Malampuson nga napahigayon ang Pre-Fiesta Assembly sa GKK San Isidro Labrador-1 nga sakop sa Parokya sa St. Mary of the Perpetual Rosary sa Buhangin niadtong Abril 29, 2018 sa alas dos sa hapon.

Ang asembliya gipangunahan ni Elpidio Lagang, ang Pangulo sa Katilingban (PSK) sa maong GKK. Kini gihimo alang sa umaabot nga ika-43 nga kapistahan sa Patron San Isidro Labrador. Gitambungan ang maong asembliya sa mga sakop o miyembro sa katilingban ug sa Parish Pastoral Team. Ang tema sa umaabot nga kapistahan: GKK San Isidro Labrador naningkamot nga mahimong matuod nga tinun-an ni Kristo diha sa pag-alagad ug sa bag-ong ebanhilisasyon ning tuig sa Klerigo ug Konsagradong tawo.

Sa maong asembliya gipresentar ug gipa-ila sa PSK ang kauban niya nga mga GKK Servant Leaders (GSL) ug mga Tigpasayon sa Pundok Banay (TPB). Niining asembliya gibalik lantaw ang pag celebrar sa niaging kapistahan pinaagi sa pag tasa (evaluate) sa mga kalihukan kung unsa pa ang angay nga palambuon sa katilingban sa umaabot nga pista ilabi na sa espirituhanong aspeto sa pagsaulog niini. Gipahibalo sa PSK ang mga preparasyon, plano ug kalihukan nga angay hatagan og panahon ug pagtagad sa katilingban. Ang Parish Pastoral Team nihatag og mga input nga nakahatag og pagtulun-an sa mga miyembro sa katilingban nga angay nilang masayran. Pipila niini mao ang pagpasabot sa importansya sa pagka mugna sa GKK, paghatag sa ensakto nga tubag ug lihok sulod sa Santos nga Misa, ang pagpasabot sa mga katungdanan ug gimbuhaton sa mga pangulo sa GKK, mga programa nga makatabang sa katilingban ug mga pamilya.

Ang Parish SoCCom Coordinator nga si Sis. Hermie Mapute gi re-echo ang iyang nakat-unan nga training sa Davao Verbum Dei Media Foundation, Inc. ang mahitungod sa “The Power of Social Communication and Mass Media”. Gi-awhag usab sa Parish SoCCom Coordinator ang mga miembro sa katilingban sa San Isidro Labrador sa paghatag og suporta sa Davao Catholic Herald newspaper pinaagi sa pagpalit og kopya niini kada Domingo ug pagsulat og balita sa mga kalihukan nga nahitabo sa ilang GKK ug ang pagpaminaw sa DXGN 89.9 Spirit FM-Davao aron masayran nila ang mga pagtulun-an sa Simbahan. Aron mapadayonon ang pagsibya sa radio ug isip suporta sa radio mitubag ang mga miembro sa katilingban sa San Isidro Labrador sa proyekto nga 25c Para sa Radyo Ko. Ang maong kantidad gamay ra kaayo kung hunahunaon apan kung ang tanan mohatag hangtod nga mapuno kini nga botelya dako ang padulngan niini.

Nanghinaut ang tanan nga unta magmalampuson ang mga kalihukan sa umaabut nga kapistahan ni Señor San Isidro Labrador sa Buhangin. (Maria Teresa Lanceta Amor, GKK SoCCom)