Kahiusahan sa Gugma: Tumong sa Santisima Trinidad

Solemnidad sa Santisima Trinidad
Deut. 4:32-34, 39-40 / Salmo 33:4-5, 6, 9, 18-19, 20, 22 / Roma 8:14-17 / Mateo 28:16-20

Ang pagtuo sa misterio sa Tulo ka Persona ug usa ka Dios, kamatuoran nga mahinungdanon tungod kay gimugna kita ngadto sa larawan sa Dios. Ang pagka-sama Kaniya ang nagtulod kanato sa pangandoy og damgo sa kahiusahan luyo sa panagbulag-bulag, ug nga mamahimong katilingban luyo sa atong pagka-lain-lain.

Ang mando ni Jesus sa atong Ebanghelyo karong adlawa, mao ang pagpadayon sa pagka-disipolo alang sa tibuok kalibutan pinaagi sa pagbunyag sa tanan sa ngalan sa Santisima Trinidad. Ang pagka-disipolo nagkahulugan sa usa ka relasyon tali sa tinun-an ngadto sa Magtutudlo. Relasyon sa gugma. Nga silang duha magka-hinigugmaay ug mahimong managhigala. Ang atong pagtuo, sa Santisima Trinidad nagpahigayon kanato sa mapadayonon nga proseso sa pagtuon niining Tulo ka mga Persona, nga nagpasabut kon unsaon ang magkalain ug pinulongan o kultura mamahimong usa, kon unsaon pag-alagad nga nagkahiusa ug unsaon paghiusa sa tibuok kaugalingon aron ang tibuok kinabuhi magmabungahon. Ang atong pagka- binunyagan, sa ngalan sa Amahan, sa Anak ug sa Espiritu Santo mao ang usa ka panaad nga makit-an ra nato ang katumanan sa atong labing halawom nga pangandoy nga anaa sa atong kasingkasing, nga mao ang pagka-mugna sa kahiusahan diha sa atong pamilya, sa atong katilingban ug kahiusahan sa atong Simbahan. Nangandoy kitang tanan nga aduna kanunay kahiusahan sa atong mga projekto, atong mga buhat sa kalooy, mga organisasyon ug uban pa. Nahibalo kita nga diha sa kahiusahan kita magmalampuson sa atong mga plano sa kinabuhi, sa misyon ug sa tanang mga pangandoy alang sa katawhan. Sama sa usa ka sambingay nga nag-ingon: Kon usa ra ang tukog sa silhig, dili kini makahimo paglimpyo sa atong nataran o salog, apan kon daghan ang mga tukog sa silhig, seguradong makabuhat kini sa iyang angayang buhaton. Diha sa atong pagpalambo sa pagtuo, nahilakip ang buluhaton sa pagtuon, pagpamalandong ug pagbansay sa atong natun-an mahitungod sa buhat sa Santisima Trinidad. Tulo ka mga buluhaton alang sa tawo aron mahimong mahigugmaon sama sa paghigugma sa Amahan ngadto sa Anak nga nagbunga sa Espiritu Santo. (Sr. Rica G. Dalaguit, FSP)