I am MAD camp ipahigayon sa Mati

Ipahigayon sa Mayor Garcia Memorial School nga nahimutang sa Magsaysay Central, Mati City, Davao Oriental, ang usa ka retreat and leadership camp karong umaabot nga Hunyo 29 hangtud Hulyo 1.

Ang maong aktibidad pangulohan sa I AM MAD kon I am Making a Difference, usa ka Non-Government Organization nga adunay dakong damgo nga matabangan ang mga kabataan.

Mukabat sa 50 ka mga kabataan nga nag edad 10 anyos hangtud 12 anyos ang musalmot sa maong programa, kinsa mga lumad ug kadtong nanginahanglan ug ayuda sa pagtungha.

Sumala sa I AM MAD nga tumong ug tuyo sa maong aktibidad na matabangan ang mga kabataan na madasig sa ilang pag-eskwela ingon man aron ipadayon sa mga kabataan ilang mga pangandoy sa kinabuhi, alang sa maayong kaugmaon.

Dugang pa nga ang maong aktibidad makatabang sab sa mga kabataan nga mamahimong responsable ug masayod sa pag-atiman sa kinaiyahan ug pag-amuma sa pamilya.

Samtang pagkahuman sa mga maong aktibidad, makadawat ang mga kabataan ug mga nagkadaiyang school supplies ilabina nga sulod bulan, balik na sab sila sa pag-eskwela.

Samtang nahibaloan sa pagpanubay dili kini ang pinaka-unang higayon nga mupahigayon ug aktibidad ang maong grupo, tungod milibot na sila sa 41 ka nagkadaiyang lugar sa nasud aron makatabang sa komunidad.

Gani niadtong Mayo 4 hangtud 6, 2017, nipahigayon sila sa susamang programa sa Zamboanga City, ug 50 sab ka mga kabataan ang mga nakabenepisyo sa maong kalihukan.

Sumala sa nakaylap na impormasyon nga ang grupong I am Making a Difference nagsugod sa pagtabang sa mga kabataan niadtong tuig 2009 ug aduna na silay natabangan nga mukabat sa 2000 ka mga benepisyaryo ug aduna na silay 400 ka mga volunteers sa Pilipinas.