GKK SoCCom Sending Forth Gipahigayon

Gipahigayon ang Sending Forth sa mga GKK SoCCom sa St. Mary of the Perpetual Rosary Parish niadtong Domingo, Abril 29, 2018. Gisaksihan sa mga parokyano sulod sa Santos nga Misa ang kapin setenta (70) ka mga SoCCom nga nitahan sa ilang kaugalingon aron mangalagad diha sa tagsa-tagsa nila ka Gagmay’ng Kristohang Katilingban (GKK).

Gipasabot sa Kura Paroko, Fr. Jess Samaniego ang katungdanan ug mga buluhaton sa mga SoCCom diha sa Gagmay’ng Kristohanong Katilingban. Gi-awhag ni Fr. Jess ang mga SoCCom nga padayonon ang pag suporta sa Davao Catholic Herald Newspaper pinaagi sa pagsulat og balita sa mga kalihukan diha sa ilang GKK ug maminaw sa radyo DXGN 89.9 Spirit FM-Davao diin tanang mga pagtulun-an sa Simbahan ug mga kalihukan sa Arkidyosis ug Parokya ilang masayran.

Niining adlawa gipahigayon usab ang pormasyon sa mga GKK SoCCom diin adunay input nga gihatag sa Parish PSP Coordinator ug Head Catechist nga si Jojo Devera mahitungod sa Year of the Clergy and Consecrated Persons. Gipaambit sa Parish SoCCom Coordinator, Hermie Mapute ang “Tips on How to Write Minutes of the Meeting” diin importante nga mahibaloan sa mga SoCCom ilabina ang SoCCom Head nga mao ang Secretary ang pagsulat sa minutos sa mga panagtigom diha sa GKK.

Malampuson ang mga kalihukan sa maong adlaw diin daghan ang mga nakat-unan sa mga GKK SoCCom ug mapasalamaton ang tanan sa suporta sa Kura Paroko, Fr. Jess Samaniego. (Hermie Mapute, SMPRP SoCCom)