Flores De Mayo: Debosyon sa mga Katolikong Pilipino ngadto kang Birhen Maria

Ang simbahang katoliko sa tibuok Pilipinas nangandam na usab alang sa naandang debosyon sa bulan sa Mayo nga gitawag ug “Flores de Mayo”. Ang pulong nga “Flores de Mayo” gikan kini sa pinulongang katsila nga nagkahulugan og “Mga bulak sa Mayo”. Ang bulan sa Mayo mao ang bulan nga tingpamulak sa bulak. Busa mao kini ang maayong higayon nga makapakita kita sa atong pag-ila ug pagdayeg kang Birhen Maria pinaagi sa paghalad og mga bulak. Maanindot kaayo ang atong kinaiya isip mga Pilipino sa paghalad ug bulak sa larawan o debolto sa atong mahal nga inahan nga si Birhen Maria. Apan kining maong debosyon makabaton lamang ug kahulugan kun ang mga bulak nga atong gihalad ngadto sa atong Mahal nga Inahan ubanan sa gugma ug pagbag-o sa atong mga kinaiya.

Nahimong debosyon sa mga bata, batan-on ug bisan gani sa mga hamtong ang pagdala ug mga bulak aron ihalad kang Birhen Maria matag adlaw sa tibuok bulan sa Mayo. Magprosisyon sila paingon sa imahen sa mahal nga Birhen Maria samtang sila mag-awit ug mga imno alang kaniya. Mag-una sa prosisyon ang giandam nga “AVE MARIA” nga dad-on sa mga bata nga nagsul-ob ug sinena sa mga anghel. Mao ning bahina nga mag-inilogay ang mga bata sa pagdala sa estandarte ug malipayon kaayo silang moduol kang Birhen Maria dala ang mga bulak nga ilang ihalad ngadto kaniya.

Gawas sa mga bulak nga ilang dad-on, gidasig usab ang mga bata nga adunay mga adlaw sulod sa semana nga ang ilang ihalad mao kadtong para sa mga kaigsoonan nila sa katilingban nga kabus kaayo ug nanginahanglan ug tabang. Mahimo nga magdala sila ug usa ka kumkom nga bugas o kaha mga de lata, asin, asukar ug uban pa. Ila kining tigumon ug pagtapos sa Flores de Mayo dad-on kini nila ngadto sa mapili nilang pamilya nga nanginahanglan kaayo ug tabang. Pinaagi niini matudloan ang mga bata nga mobati sa mga nanginahanglan sa ilang katilingban. Ang debosyon sa “Flores de Mayo” kahigayonan gayud sa tanan nga makat-on sa ilang pagtoo tungod kay aduna may katekesis matag adlaw, motubo sa ilang pagkamaampoon tungod kay aduna may himoon nga pag-ampo sa Santo Rosaryo sa dili pa maghalad ug mga bulak ug kahigayonan usab kini nga mahimong konkreto ang ilang pagtoo diha sa ilang paghimo ug mga buhat sa kalooy ngadto sa uban.

Daghang mga gihimo ug gidugang nga mga kalihukan ang mga katekista sa Gagmayng Kristohanong Katilingban panahon sa Flores de Mayo sama pananglitan sa paglimpyo ug pagtanum ug mga bulak palibot sa kapilya aron makat-on ang mga bata sa pag-amoma ug pag-atiman sa ilang kapilya. Ang mga kabataan makaamgo usab sa ilang responsibilidad sa pag-atiman sa kabuhatan sa Dios kay sila kabahin man niini. Aduna usab silay mga dula-dula human sa Flores de Mayo aron mas magka-ilhanay pa gyud sila isip mga sakop sa maong GKK.

Nindot kaayo nga nahimong kabahin sa kultura sa mga Pilipinong Katoliko ang Flores de Mayo. Apan kanus-a man gayud nagsugod kining maong debosyon ngadto sa atong mahal nga inahan nga si Birhen Maria? Gituohan nga ang Flores de Mayo nagsugod niadtong 1800 pa sa dihang giproklamar sa Batikano ang dogma sa Imakulada Conception. Kining maong debosyon gidala sa mga espanyol dinhi sa Pilipinas ug tungod kay ang Pilipinas relihiyoso man kaayo nga nasud nagpadayon kini hangtod karon.

Ang pinaka-highlight sa Flores de Mayo sa kadaghanang mga lugar dinhi sa Pilipinas mao ang “Santa Cruzan”, agi ug pasidungog kang Santa Helena inahan ni Constantine the great—ang unang Kristiyano nga emperador nga maoy unang nakakita sa relics sa tinood nga krus nga namatyan ni Jesus. Mga tulo ka gatus ka tuig human si Jesus namatay, gipapangita ni Reyna Helena ang tinood nga Krus nga namatyan ni Jesus didto sa kalbaryo. Pag-edad niya ug 75 anyos, adunay nakit-an nga tulo ka krus. Aron ma-ilhan kung asa sa tulo ang tinood gayud nga Krus nga namatyan ni Jesus, gisugo niya ang mga masakiton niyang ulipon nga mohikap sa tulo ka krus. Nakita nga usa sa tulo ka Krus nakaayo sa mga masakiton nga ulipon. Tungod niini, ilang gituohan nga ang maong Krus mao gayud ang samang krus nga namatyan ni Jesus. Mao nga ang pulong nga “Santa Cruzan” gikan sa pinulongang espanyol nga nagpasabot ug “Holy Cross” o “Balaang Krus”. Ang Santa Cruzan himoon sa katapusang adlaw sa Flores de Mayo (May 31). Pagasugdan kini og Santos nga Misa unya mosunod dayon ang prosisyon sa mga piniling babaye o mga batan-on nga gitawag og mga reyna sa Flores de mayo aron sa pagpangita sa nawalang krus nga namatyan ni Jesus ug ang makakita niini mao si Reyna Elena. Human sa prosisyon nga nagsimbolo sa pagpangita sa krus, mosunod dayon ang pagkorona sa napiling Reyna Elena ug unya adunay salo-salo ug pagsadya pinaagi sa mga sayaw ug awit timaan sa kalipay nga ang tinood nga krus nakaplagan na.

Alang sa tanan ang Flores de Mayo isip tradisyon sa mga katolikong Pilipino dili gayud mawala sa atong kalendaryo bisan pa kung daghan na kaayong mga kausaban sa kultura sa atong bag-ong henerasyon karon. Magpabilin gayud ang maong tradisyon sulod sa bulan sa Mayo dinhi sa atong nasud sa Pilipinas tungod kay suod man sa atong dughan ang atong mahal nga inahan nga si Birhen Maria. Hinaut pa nga ang atong debosyon ngadto kang Birhen Maria sulod sa bulan sa Mayo magdala ug magdasig unta kanatong tanan sa pagsunod sa iyang mga hiyas aron sama kaniya mamahimo kitang mga tinood nga disipulo ni Kristo. (Hiyasmin B. Campos)