Espiritu Santo: Maglalamdag Alang sa Kahiusa

Dominggo sa Pentekostes
Buhat 2:1-11 / Sal. 104 / 1 Cor. 12:3-7 / Jn. 20:19-23

Kasagaran sa dili pa magsugod ang mga klase, ilabina sa mga Katolikong tulunghaan, adunay gitawag nga Holy Spirit Mass. Sa dili pa mag-abli ang mga dagkong tigum sama sa milabay nga Ikaduhang Konsilyo Plenaryo sa Pilipinas niadtong 1991 o Ikaduhang Konsilyo Batikano niadtong 1962, aduna gayoy Misa o pag-ampo nga motawag sa lamdag sa Espiritu Santo nga mogiya sa maong mga kalihukan aron maangkon ang kahapsay ug panaghiusa aron makab-ot ang gipangandoy nga tumong.

Karon nga gisaulog sa tibuok Simbahan ang Domingo sa Pentekostes, gipahimangnuan kita nga ang Simbahan napaila sa tibuok kalibotan pinaagi sa pagpabuhagay sa Espiritu Santo. Kini nag-abli sa bag-ong panahon, ang panahon sa Simbahan diin iyang mapabati ang presensiya ni Kristo ug ang mga buhat sa kaluwasan iyang masangyaw. Kini ang panahon diin si Kristo diha ug uban sa Simbahan sa nabag-o nga pamaagi molihok ug mopatunhay sa iyang mga buhat sa kaluwasan.

Ang gasa sa Espiritu Santo makita diha sa panaghiusa taliwala sa nagkadaiyang gasa. Wala ka ba makabantay nga bisan ang Santo Papa Francisco ug mga nangaging Santo Papa gidugok man sa lain-laing tawo, mga puti o itum o brown man ang kolor, lain-laing mga edad o propesyon sa tibuok kalibutan? Wala ka ba makabantay nga ang mga Obispo ginahangyo man nga motambag uban sa ilang kaalam ug motabang sa gobyerno ug sundalo, sa mga rebelled ug criminal? Dili ba ang pari gitahod man bisan sa lain-laing tinuohan, Muslim man o Protestante ug bisan niadtong mga walay pagtoo? Dinhi sa atong katilingban, dili ba ang mga pangulo o GSL gitawag man sa panaghiusa dili lamang sa atong GKK kondili usab sa kaluhukan ug mga napili nga pangulo sa atong barangay?

Atong paninguhaon nga sa ugma nga mopili kita sa mga pangulo sa atong barangay, ang Espiritu Santo molamdag unta sa matag usa kanato aron ang atong mapili mao kadtong magpatunhay sa kinabuhi ug kahiusa sa atong palibot. Pinaagi sa lamdag sa Espiritu Santo, mapuno unta kita sa kaalam aron isip mga sakop sa atong GKK ug barangay, ang kahiusa nga magdala kanato sa kinabuhi unta motunhay.