DACS, PPCRV nangandam sa Piniliay

Nangandam na ang Davao Association of Catholic Schools (DACS), Parish Pastoral Council for Responsible Voting (PPCRV) aron adunay Election that is Clean, Honest, Accurate, Meaningful and Peaceful (E-CHAMP) karong Mayo 14 pinaagi sa ilang Operational Plan.

Kini gipahigayon sa DACS Office sa Juna Subdivision, Matina, Davao City niadtong Mayo 2 aron mapangandaman ang Sangguniang Kabataan ug Barangay Elections.

Gihisgutan sa maong tapok ang mga angayang pagabuhaton sa mga botante ug ang mga kwalipikasyon sa mga kandidato nga ilang pagabotaran sa adlaw sa eleksyon.

Ang Commission on Elections (COMELEC) nagpahimangno usab nga dapat mosubay sa mga patakaran ug mga pamaagi ang mga botante ug mga kandidato.

Ginadili ang pagpangampanya sa adlaw sa eleksyon kay aduna nay adlaw nga gitakna ang COMELEC kabahin niini. Sa mga kandidato nga nag-unauna ug butang sa ilang mga posters sa wala pa ang Mayo 4 magpatigayon ang COMELEC ug “Oplan Baklas” pinaagi sa tabang sa PNP ug mga opisyales, dugang sa COMELEC nga limitado lamang ang lugar nga pwede butangan.

Gikinahanglan usab nga ang paga-gamiton sa mga kandidato nga mga materyales sa ilang pagpangampanya kay mga recycled materials ug dapat dili kini mulapas sa kantidad nga gimando sa gobyerno.

Sa mahitabong umaabot nga eleksyon manwal ang pamaagi sa pagbotar ug pag-ihap sa mga balota diin dili pareho sa niaging tuig nga otomatic.

Gipili usab sa COMELEC nga manwal ang eleksyon karong tuiga kay aron dili gasto ug mas barato ang gasto kaysa sa magpa-printa ug mga balota.

Sa mga kandidato nga modaug ug wala modaug, gikinahanglan sila nga magsumitar ug Statement of Contributions Expenditure kon SOCE.

Nagsulti ang COMELEC nga 95%, andam na ang tanan alang sa umaabot nga eleksyon. Oryentasyon nalang ang kulang ngadto sa mga electoral board. (Rosechelly Atillo | FSUU Intern)