CBCP president mitimbaya sa re-elected na kapitan

Personal nga mitimbaya si Catholic Bishops Conference of the Philippines President Davao Archbishop Romulo Valles ngadto kang Barangay Kapitan Jessie Areja sa Barangay Malabog, Paquibato District ning syudad sa Davao atul sa subling pagkapili sa kapitan sa bugnong lugaynon nga gipahigayon niadtong Lunes.

Ang maong pagtimbaya sa arsobispo sa kapitan atul sa ika-50 nga kapistahan sa GKK San Isidro Labarador, sa Sitio Panulawan, Barangay Malabog Paquibato. Diin gitambungan sa kapitan ang misa nga gipahigayon sa alas 10 sa buntag kagahapong adlawa nga gipangulohan mismo sa arsobispo.

Gi-awhag sa arsobispo ang katawhan nga magtingabangay human sa gipahigayong piniliay, sumala pa nga natural lamang nga adunay mga dili mudaug sa bugnong lugaynon tungod usa lamang ang mamahimong kapitan sa barangay kuyog sa iyang kagawad, apan importante nga magkahiusa ang tanan, ilabi na ang simbahan ug ang barangay tungod usa lamang ang tuyo mao ang alagaran ang katawhan.

Samtang nahibaloan nga si Archbishop Valles, ug kapitan Areja, pulos mga myembro sa Davao City Peace Committee nga gimugna ni Davao City Mayor Inday Sara Duterte Carpio aron motabang sa pagpangita sa pamaagi aron maangkon sa syudad ang tukmang kalinaw.