Buhing saksi sa pagtukod sa GKK sa Malabog

Isa sa buhing saksi sa pagtukod sa GKK San Isidro Labrador, Panulawan nga sakop sa San Roque Parish Malabog mao si Nanay ERLINDA ESCARILLA, siya kaniadto aktibo sa mga kalihokan sa mga batan-on sa 8 ka mga Santos nga ilang gidumalahan.

Magtapok-tapok sila pinaagi sa sayawan ug wala madugay nakadesisyon sila nga himoong GKK ilang patron pinaagi sa pagbunot-bunot ug ang nabunotan mao ang Patron ni San Isidro Labrador.

Niadtong Mayo 16, 1968 ug hangtod karon ginasaulog na kini ug niining tuiga gisaulog kini uban sa tema: San Isidro Labrador inubanan sa lig-ong pagtoo ug pagpangalagad.

Niuli gayod siya gikan sa Cotobato alang lamang sa pagsaulog sa ika-50 ka tuig nga kapistahan sa maong patron. Ug aduna kini karon 135 ka mga membro sa maong GKK.

Dako ang kalipay sa mga taga-Panulawan kay ang Arsobispo sa Davao nga si Most Rev. Romulo Valles gayod ang nagmisa inubanan pa sa among kura paroko nga si Rev. Fr. Jemasol Ortiz niadtong adlawa Mayo 16, 2018.

Diha sa homiliya ni Bishop nga si San Isidro Labrador usa ka mag-uuma. Aduna pa siyay mga hagit para kanatong tanan: una pag-atiman sa simbahan diha sa pagtoo, ika-duha pag-atiman sa gasa sa kinaiyahan labi na sa atong mga tanom nga diha kita nagkuha sa atong panginabuhian, ug ika-tulo pag-atiman sa gasa sa kinabuhi ngadto sa panglangitnong pangkinabuhi.

Nalakip pa ni bishop ug sulti si Kapitan Jessie Candia Areja nga sa tanang kapitan sa Davao siya ra ang iyang nailhan nga kapitan, maayong modelo sa katawhan. Human sa misa gisunod dayon ang pagbunyag sa 6 ka mga bata nga gibunyagan ni Fr. Jojo Ortiz.

Nagpasalamat ang PSK Pangulo sa Katilingban nga si Marivic Alferez labi na ka Bishop Romulo Valles, kay Fr. Jojo Jemasol Ortiz, sa mga bisita ug mga membro ug sa mga pangulo nga nagtinabangay aron magmalampuson kining among kapistahan.

Nagsalosalo dayon ang tanan ug nagpadayon ang activities hangtod gabii nga gipangulohan sa mga batan-on. (Melba Atuel | GKK SocCom)