Semana Santa malampuson nga gisaulog sa Agdao Parish

Asa man ang atong lugar sa Simbahang Katoliko?

Unsa man ang atong ikahatag sa atong Simbahan aron kini mabuhi ug motubo?

Niining milabay nga pagsaulog nato sa panahon sa Kwaresma ug Semana Santa, unsa man ang nahitabo kanato isip miyembro sa atong Simbahan?

Diha sa parokya sa San Antonio de Padua, sa Agdao, nahitabo gayud ang pagpangandam, kinaugalingon ug parokya, aron mahitabo ang bulahanong pagsaulog sa panahon sa Kwaresma ug Semana Santa karong tuiga.

Sa pag-abli sa Kwaresma diha sa Miyerkoles sa Badlis, miabot sa duha ka Misa nianang adlawa, sa alas sais sa buntag ug alas singko sa hapon, ang mahinangpon nga mga parokyano diha sa ilang Simbahan. Ang usa ka alagad nila sa GKK, nga niadtong panahona naa man sa hospital kay nagkasakit, naghandom sa pagbadlis. Ug wala gayud siya pakyasa sa Ginoo sa iyang pag-ampo kay tungod diha sa gawas sa iyang hospital room nahitabo ang Santos nga Misa ug sila nga mga pasyente nakadawat sa badlis ug kalawat. Tinuod gayud nga ang Ginoo ang magbalantay ug maghatag kanato sa tanan! Moduol kita Kaniya.

Giandam usab ang parokya diha sa Sakramento sa Kumpisal. Niadtong gabii sa Marso 23 gipuno sa mga parokyano ang Simbahan sa San Antonio de Padua. Trese (13) ka pari ang midawat kanila, ang pinaka-daghan nga numero sa mga pari sa walo (8) ka tuig ni Fr. Toto isip kura paroko. Nalipay gayud si Aida, katekista sa eskwelahan, sa pagtubag sa iyang mga pahibalo diha usab sa GKK. Ang mga altar servers nga sila Andrei, Luis ug Leo miabot kay tungod nakita nila ang kabililihon sa Sakramento sa Kumpisal diha sa ilang batan-on pa nga kinabuhi. Ingon ni Luis nga, “dili padaghanon ang sala, kinahanglan nga mangayo og pasaylo sa Ginoo pinaagi sa Kumpisal.” “ Ang Ginoo ang tag-iya sa atong kinabuhi, naghatag sa atong kinabuhi, magrespeto ta pinaagi sa pagpangayo sa pasaylo”, kumpiyansa nga pagsulti ni Leo, trese anyos. Ug sa iyang pagdawat sa kapasayloan, iyang iampo ang iyang mga kaparyentihan nga mipanaw na nga “makita nila ang kahayag ni Kristo.” Ang 64 anyos nga si Bating miingon nga,” pinaagi sa akong tingog ug baba madungog sa Ginoo ang akong pagpangayo sa pasaylo sa akong mga sala diha sa pari.”

Namalandong ang mga GSL ug mga miyembro sa 78 ka GKK, katong miabot sa pagsalida sa DANTE (usa ka musicale) niadtong Marso 4, Marso 26 ug 27 diha sa St. Mary’s Hall ug sa sulod sa Simbahan. Pinaagi niining salida nga nagpakita sa paglaum nga magsukad kang Kristo, ang mga kabataan nga mitan-aw nakakita usab sa paglaum ni Dante. Ingon ni Lawrence ug sa iyang mga amigo nga “good si Dante kay nakabawi siya, gigamit niya iyang talent nga mahimong hope ug matabangan nga makabalik sa Ginoo.” Sa ilang pagtan-aw niadtong salida sila usab nakatabang sa Prison Ministry sa Cagayan ug Davao, sa St. Francis Xavier Major Seminary ug sa Sagop Kinabuhi II nga programa alang sa mga drug reformists sa ilang parokya.

Gipadala ang kapin usa ka-gatos nga Pangulo sa Liturhiya sa ilang pag-alagad diha sa GKK sa usa ka sending forth ceremony sa Santos nga Misa niadtong Dominggo sa Lukay. Sulod sa 40 ka adlaw sa Kwaresma, ang mga PSL mihatag sa ilang panahon ug serbisyo sa pagpahigayon sa mga pag-ampo diha sa Alay Kapwa , sa estasyon sa Krus ug Kasaulogan sa Pulong sa tagsa-tagsa nila nga GKK. Ug diha sa Simbahan mapadayonon ang pag-alagad sa mga gagmay’ng kaabag sa mga pari, ang mga altar servers, kay ang kapin 50 kanila ang gipadala usab diha sa Santos nga Misa niadtong Marso 26.

Nagmugna ang Parokya og usa ka hiniusang lihok aron maandam ang seguredad ug kahapsay sa panahon sa kasaulogan sa Semana Santa. Natapok ang 129 ka mga volunteers ug staff sa Davao Firefighters and Rescue Services (DFRS), ang Distress Assistance Radio Communication ug sa Parish Disaster Action Response Team (PDART). Ang mga Barangay Police ug mga ka-pulisan miabot usab aron sa paghatag sa ilang tabang. Si Padre Leonie Espaῆa, ang kura paroko, ang nahimong “responsible official” sa tibuok sistema nga namugna, nga unang nahitabo sa Archdiocese sa Davao kung asa adunay Incident Command System (ICS) nga gipahigayon sa parokya sa panahon sa kasaulogan sa Semana Santa. Walay nahitabong kakulian sa pagpahitabo sa mga prosesyon diha sa kadalanan sa Agdao niadtong Biyernes Santo ug sa mga kalihukan diha sa Simbahan. Ang mga nanginahanglan sa tabang medikal nahatagan dayon sa ilang panginahanglan kay ang medical team abtik nga mihatag sa ilang serbisyo. Dako gayud ang pasalamat ni Glen Petere, medical team leader sa PDART, kang Padre Toto sa iyang pagmugna sa maong pundok diha sa parokya, sa DARCOM ug DFRS kay sumala niya,”wala gyud mi gibiyaan nila diha sa pag-atubang sa among buluhaton” ug sa iyang pundok sa ilang “maayo kaayo nga relasyon sa usa’g usa” nga mipalambo sa ilang pagserbisyo.

Miagi silang tanan sa sakripisyo, miagi sila sa mga kalisod, sa pagtahan sa mga kaugalingon diha sa pagsimba sa Ginoo ug sa pag-alagad sa uban niining panahon sa kasakit ug kamatayon ni Kristo.

Miabot silang tanan aron sa pagtabang sa pagtukod sa Simbahan- ang Simbahan nga karong Pasko sa Pagkabanhaw ni Kristo mipalanog sa ilang kahiusan ug paglaum ug mopadayon sa pagsaksi diha sa kinabuhi nga si Jesus nabanhaw na gayud.

Mipalanog sa ilang pagpasalamat sila Padre Toto España ug Padre Don Silvosa sa tanan nga nakiglambigit sa kalampusan sa selebrasyon sa kaluwasan. (Elena Corazon B. Mozo)