Saligi kami, gikan mi sa SKP2!

Mao kini ang mga letra nga nakasulat sa likod nga bahin sa t-shirt atong 25 ka mga lalaki ug babae nga mitambong sa Santos nga Misa diha sa San Antonio de Padua Church niadtong buntag sa Abril 7. Kauban ilabi na ang ilang mga pamilya, sila miabot aron sa pagpamatuod sa ilang pagbarog sa pagbag-o sa ilang kinabuhi. Sila ang mga VSRP o Voluntary Submission for Reformation Persons o ang mga kanhing drug dependents nga malahutayong miapil sa programa sa Arkidayosis sa Dabaw – ang Sagop Kinabuhi II.

Sulod sa 17 ka Dominggo, sila miagi sa psychological ug spiritual formations nga nagdala og kabag-ohan nga mihimo kanila nga mga “persons in recovery” ug midala kanila diha sa Moving-up Ceremony ug Fun Day nianang adlawa.

“Madasigon nga mipadayon ang parokya”, sumala ni Fr. Bong Dublan, ang ASAC Director. Ang nahitabong moving up “timailhan sa kamatuoran sa pagkabanhaw ni Hesus diha sa mga PR; nakita nato ang pag-laum”, dugang pa niya.

Diha sa Fun Day nga misunod sa St. Mary’s Hall, gipalanog sa mga PR ang ilang kalipay diha sa paghiusa sa pagkaon ug pag-apil sa tanang bahin sa programa. Midula sa mga “larong Pinoy”, mikaon ug naminaw sa mga testimonya sa mga kaubanan ug sa mga pulong-inspirasyon nila Jun Estoque, Dennis Mabayaw ug Kapitan Campuso, mga haligi sa SKP2.

Ang Gabay nga si Edwina mipalanog sa iyang kaikag sa pagpadayon kay sumala niya nga ang seminar nga iyang naapilan “makatabang gayud dili lang sa akong gi-gabayan kung dili apil katong wala pa makasulod sa maong kahimtang sama sa akong mga anak, apo ug laing tawo.”

Kanila nga mga PR ang “Ginoo ang unang inspirasyon ug ang mga tawo nga nakiglambigit kanila padulong sa pagbag-o — ang mga tawo sa Barangay, sa GKK ug taga SKP2 nga mitabang kanila sa pagkab-ot sa ‘ikaduhang higayon’ sa kinabuhi, ilabi na sa kura paroko sa San Antonio de Padua Parish, Fr. Toto Espaῆa nga maoy nanguna sa maong programa.”

“Pagdaog sa kahayag batok sa kangitngit”, mao kini ang nahitabo kanila.

“Asa kaha kita kung walay paglaum sa kabag-ohan?”, pangutana ni Fr. Dublan.

Ang SKP2 sa San Antonio de Padua Parish, Agdao ang paglaum sa kabag-ohan para sa mga persons in recovery ug sa umaabot pa nga mga VSRP. Saligan nato sila nga naningkamot sa pagbitbit sa kahayag sa paglaum. (Elena Corazon Mozo | SADP SoCCom)