Palawom sa imong pagtoo

Ikatulong Domingo sa Pasko sa Pagkabanhaw
Buhat 3:13-15,17-19 / 1 Juan 2:1-4 / Lukas 24:35-48 / Salmo 4:2,4,7-8,9

Karon ang ikatulong dominggo sa pagkabanhaw. Sa atong ebanghelyo atong nadunggan na ang mga tinun-an nagduha-duha ug nabalaka kung kinsa ilang nakita. Nangahadlok sila na basin espiritu ang ilang nakita. Ang mga tinun-an nga mao kauban ni Hesus matag-adlaw, naminaw sa iyang mga pulong ug nakakita sa iyang mga milagrong binuhatan, nagduhaduha kung sya ba gayod ang ilang nakita. Mao nga si Hesus mipadayag sa iyang kaugalingon ug gipakita niya ang iyang mga samad ug nikaon siya. Kini iyang gihimo aron mapamatud-an nga siya gayod kadto.

Kini nga ebanghelyo nag-awhag kanato sa pagpalawom sa atong pagtuo. Si Hesus nabanhaw na. Tinuod kana. Mao kana ang gitudlo kanato ug mao kana ang atong mabasa sa bibliya. Si Hesus namatay ug nabanhaw para kanato. Siya naga-uban kanato matag karon ug unya. Dili na kini bag-o apan atoa pa ba gihapon kaha ning tuohan kung kita anaa na sa kapit-os ug kalisod? Maka-ila pa ba kaha kita na anaa ang Ginoo sa atong taliwala kung kita naglisud na? Lisud gayod mga igsuon na pangitaon ang Ginoo sa panahon sa kalisud. Sa panahon nga kita gilamoy sa kahadlok ug kabalaka. Lisud ilhon ang Ginoo. Wala man gani kaila ang mga tinun-an sa iya nga pirti nilang uban-uban kita pa kaha? Apan kung andam lamang kita na mogunit kaniya ug abli kita na siya makapadayag kanato, kita makabantay nga siya anaa naga-uban kanato.

Mga igsuon lisud tuohan nga ang Ginoo anaa sa panahon sa kalisud. Apan kung dili lang kita mobiya kaniya ug dili lang kita molayo kaniya, kung abli lang kita sa atong kaugalingon na dawaton siya, kita makaila kaniya. Taga-i ug panahon na ang Ginoo nga mas mopadayag sa iyang gugma kanato aron kita maka-ila kaniya. Kung naglisud ta, atong dawaton, kay parte man kana sa atong kinabuhi. Apan dili kini rason na molayo kita kaniya. Dili kini rason na kalimtan nato nga naay Ginoo tungod sa atong problema. Mas dako ba imong problema kaysa Ginoo? Mas gamhanan ba ang imong problema kaysa Iyaha? Mga igsuon ang Ginoo nabanhaw na. Siya naga-uban kanato. Atoa lang siyang pangitaon matag karon ug unya. Pangutan-a ang imong kaugalingon, “asa kaha ang Ginoo sa ani nga sitwasyon?” ug siya mopadayag sa iyang kaugalingon diha kanimo. (Sem. Marvin Del Campo)