Pagtuo ug Pagka-Tinun-an diha sa Plano sa Diyos

Ika-lima nga Domingo sa Pagkabanhaw
Buhat 9:26-31 / 1 Juan 3:18-24 / Juan 15:1-8 / Salmo 22:26-27, 28, 30, 31-32

Ang pagtuo ug ang pagka-tinun-an dili usa ka personal nga buhat sa pagkab-ot ug pagka-malampuson, aron mahingpit nga Kristiyano, tungod kay kini mga gasa man. Mahimo lamang kitang sama kang Cristo, tungod kay plano kini sa Dios, (Jn 6:14) ug kita gipili ni Jesus nga mahimong iya. Ang atong pagka Kristiyano dili sama sa ‘rtw o ready to wear’ na sapot. Tungod kay kini kinahanglan man nga adunay plano ug mga han-ay nga buluhaton.

Usa ka giplanohang buluhaton sa paglambo ug pagtubo aron mahimong matuod nga tawo ug Kristiyano, nga mao ang tumong sa atong tawag. Miingon si Jesus nga gipili niya kita, aron nga kita magpabiling mamunga. Unsa man nga bunga? Tataw kaayo ang tubag niini diha sa sulat ni San Pablo diha sa Uno Corinto 13:13 “Busa kining tulo magpabilin: pagtuo, paglaum ug gugma. Apan ang labing dako niini mao ang Gugma.”

Ang bunga nga mao ang ‘gugma’ magpabiling nakahigot, sa mga sugo ni Jesus nga nag-ingon: “paghinigugmaay kamo sa usag-usa.” Busa ang pagpamatuod niining matang nga gugma masulayan diha sa kinaiyang pagsakripisyo alang sa kaayuhan sa uban, nga mao ang gibuhat ni Jesus: “sama ra nga si Jesus nahigugma kanato, hangtud nga gihatag niya ang iyang kinabuhi alang kanato.”

Ang tinuod nga gugma moagi sa kasakit, pag-antus, pagpaningkamot, sama sa gugma nga gipakita sa atong mga ginikanan, sa ilang pagmatutuo, pagpatubo ug pagpa-eskwela kanato aron mahimo kitang sangkap sa kinabuhing hamtong ug mabungahon nga tawo sa katilingban. Pananglitan ang pagpasaylo, pagpasensya, pagpa-ubos, pagsalig sa uban, pagtahud ug uban pa nga kinaiya nga makita nato diha sa ebanghelyo nga gibuhat ni Jesus. Tinuod lisod kaayong buhaton apan mao kana ang mga gisugo kanato ni Jesus, aron mamahimo kitang sama kaniya. Aron sama kang San Pablo makaingon kita nga ‘dili na ako ang nabuhi ning akong kinabuhi kondili si Jesus ang buhi dinhi kanako.’ Mao kana ang adunay pagtuo ug usa ka tinun-an ni Jesus.

Mahimo ba kaha kana nato? Mahimo kana, tungod kay si Cristo sa kanunay naga-uban kanato. Siya na mismo ang mohatag sa grasya nga mabuhat kana kon mag-ampo kita kaniya ug motuo nga siya uban kanato. Dili kita niya pasagdan. Mao kana ang iyang Saad, ug Plano sa Dios. (Sr. Rica Dalaguit, FSP)