Ikaduhang Dominggo sa Pasko sa Pagkabanhaw

Buhat 4:32-35; 1 Juan 5:1-6; Juan 20:19-31

Karong Domingoha mao ang ikaduhang Domingo sa Pagkabanhaw sa atong Ginoong Hesu Kristo og ang Divine Mercy Sunday o Diosnong Kalooy. Diha sa atong Ebanghelyo karon gipakita ni Hesu Kristo sa iyang mga tinun-an ang mga uwat sa iyang kamot ug sa iyang kilid nga agi sa lansang og bangkaw. Ang iyang kilid nga giduslak sa bangkaw diin mibuhagay ang dugo ug tubig mao ang buhing timaan sa iyang tiunay na kalooy ug gugma alang kanatong tanan. Tungod sa iyang kalooy, iyang gigasahan ang mga apostoles sa Espirito Santo diha sa gahum sa pagpasaylo sa mga sala isip Sakramento sa Kumpisal na atong gidawat hantod karong panahona na giministrohan sa mga kaobispohan og kaparian.

Usahay pangutan-on kita sa ubang sekta/relihiyon ngano mangumpisal man kamo sa pari? Wala man kana sa biblia ang Kumpisal! Kamo mga Katoliko ba nag-buhatbuhat ra gayod mo’g inyung doktrina! Usahay wala kitay matubag bahin niini og usahay mao pay dahilan mo balhin ang uban sa laing sekta/relihiyon. Mangutana kita, kinahanglan ba gayod nato e-kumpisal atong mga sala dadto sa pari? Dili ba pwede nga kita ray mangayo og sorry sa Ginoo; nga, kabalo man kita nga ang Ginoo ray makapasalyo sa atong mga sala? Tama, ang Ginoo ra gayod ang makapasaylo sa atong mga sala (Mk 2:5). Pero, gitahasan ni Hesus ang iyang mga apostoles sa gasa sa Esprito Santo diha sa gahum sa pagpasaylo. Si Hesus miingon, “Dawata ninyo ang Espirito Santo. Kon pasayluon ninyo ang mga sala sa mga tawo, gipasaylo kini; kon ang ilang sala dili ninyo pasayluon, dili usab kini pasayluon” (Jn 20:22-23), klaro kaayo mga igsoon nga si Hesus mismo ang nagbatyag niini sa iyang mga apostoles. Tungod sa iyang balaang katumanan, iyang gipadala ang mga apostoles na mamahimong ‘representative’ o tinugyanan og panig-ingnan niya, kay siya miinigun ‘ingon nga gipadala ako sa Amahan, ako usab nagpadala kaninyo’ (Jn 20:21). Gikan sa gahum sa Sakramento sa Ordinasyon, ang pari midawat sa gahum sa Espirito Santo ngadto sa Obispo nga gitugyan ni Kristo ngadto sa iyang mga apostoles. Gikan ni San Pedro og mga apostoles padulong sa atong Santo Papa Francisco, ang gahum sa ‘sucession’ o pagpadayon wala gayo’y pagkaputol-putol. Mao na makasulti kita nga walay laing simbahan na gitukod ni Kristo Hesus, ang Holy Roman Catholic Apostolic Church. (Efren Gubac, Jr.)