Hospitalization Assistance Program gipalig-on

Ang GKK Servant Leaders sa San Isidro Labrador, Ciudad de Esperanza (SIL-CDE) nga nahisakop sa St. Mary of the Perpetual Rosary Parish, Buhangin, madasigon nga mitambong sa gihimo nga General Assembly sa tanang miembro sa St. Mary Parish Hospitalization Assistance Program nga gipahigayon sa Parish Gym. Malipayon gayud ang mga GSL sa SIL-CDE nga nabitbit usab ang Davao Catholic Herald Newspaper nga diin anaa ang hulagway sa mga GSL ug mensahe alang kang Most Reverend Abel C. Apigo, new bishop of the Diocese of Mati.

Gipahigayon ang maong asembliya niadtong Domingo, April 22, 2018 sa ala una y medya ang takna sa hapon. Ang nangulo sa maong asembliya mao si Brod. Jojo Coraje, ang Parish Social Action Ministry (PSAM) coordinator. Gitambongan kini sa nagkalain-laing ministriya sa parokya, PARECO ug TPB. Gilakbit pag-usab ang mga kaayuhan ug benepisyo niini nga programa diin ang Kura Paroko nga si Rev. Fr. Jess Samaniego nga mao gayud ang nagpasiugda niini. Malampuson nga nahuman ang maong asembliya sa alas dos y medya sa hapon. (Arsenia Barimbao, GKK Soccom | Photos by Hermie Mapute)