PPC Lenten Recollection Gipahigayon

Malampuson nga gipahigayon ang Lenten Recollection sa mga miembro sa Parish Pastoral Council (PPC) ug Parish Pastoral Team sa St. Mary of the Perpetual Rosary Parish kaniadtong Marso 16 ug 17, 2018. Gihimo ang maong recollection sa Captain’s Haven, Barangay Salumay, Marilog District. Ang tema: “PPC Katambayayong sa mga Kaparian ug mga Relihiyoso alang sa Bag-ong Pagsangyaw kang Kristo”. Adunay baynte-singko (25) ka mga pangulo sa nagkalain-laing ministry ang nitambong.

Gisugdan ang recollection sa usa ka silent prayer o meditative prayer nga gipangulohan sa tigpasayon nga si Sis. Hermie Mapute nga usa ka Associate sa MIC sisters. Ang maong kalihukan gihimo aron mabati sa matag usa ang presensya sa Ginoo diha sa kahilom sa kaugalingon pinaagi sa pagpamalandong. Human sa maong meditative prayer gihimo ang pagpaila sa matag partisipante ug sa pagsaysay sa mga kasinatian diha sa pagpangalagad sa nagkalain-laing ministriya sa GKK ug sa parokya. Gibahin sa tulo (3) ka grupo ang mga partisipante alang sa usa ka buluhaton nga ang pagtubag o pagpamalandong sa mga pangutana diin gipasabot sa tigpasayon ang proceso sa maong actividades: Adunay giya nga mga pangutana sa maong pamalandong sama sa mosunod: (1) Isip miembro sa parish pastoral team ug katambayayong sa mga Kaparian diha sa parokya, unsay inyong na experience or nasinati or gibati sa pakig uban sa mga Kaparian ug mga Relihiyoso? (2) Naa bay kalamboan nga nasinati sa imong kinabuhi sa espiritual nga aspeto ug uban pa? (3) Unsay imong natampo sa mga Kaparian ug sa mga tawo nga nagpuyo sa konsagradong kinabuhi diha sa pagpalambo sa ilang bokasyon? Matag grupo nagpaambit sa ilang pamalandong. Ang mga PSL nga sila Bro. Jun Nardo or Bro. Naldo Villodres maoy nangulo sa mga pag-ampo sa adlaw nga tanan. Gihuman ang maong recollection pinaagi sa Santos nga Misa nga gipangulohan sa Kura Paroko, Fr. Jess Samaniego.

Nalipay ug mapasalamaton ang PPC-Parish Pastoral Team sa gihatag nga oportunidad sa Kura Paroko, Fr. Jess Samaniego diin nahatagan og higayon nga masuod ang matag usa sa nagkalain-laing ministriya panahon sa bonding session. Sa maong kalihukan mapalambo pa ug makahatag og pagdasig sa matag usa nga mapadayonon sa pagpangalagad. (Maria Teresa Lanceta Amor | GKK SoCCom | Photos by Hermie Mapute)