Nahinugon ka ba sa imong kinabuhi?

Ikalima nga Domingo sa Kwaresma
Jer. 31:31-34/ Sal. 51:3-4, 12-15/ Heb. 5:7-9/ Jn. 12:20-33

Bililhon ba nimo ang imong kinabuhi? Nahinugon ka ba niini? Giunsa nimo kini pag-amping?

Usa ka estudyante walay nahimo taliwala sa temtasyon sa computer ug barkada. Siya nahimong addict sa dula nga dota, ug tungod niini nabagsak siya sa iyang pagtuon ug wala na makahuman pag-eskwela. Diha puy laing tawo nga gipadad-an kanunay ug kwarta sa iyang tatay nga nagtrabaho sa abroad aron ipaayo sa ilang balay apan wala siya makaikyas sa tentasyon sa sugal. Igo ra kining nahurot sa sugal ug walay agi ang nakita aron ipaayo ang maong balay hangtud nga gihatud siya sa pagmahay.

Si Santo Papa Francisco miingon nga ang kinabuhi molambo kung kini ipaambit ngadto sa uban, apan kini maluya kung kini manuguro sa kaugalingon lamang. Mao kini ang dakung talinghaga sa gisulti usab ni Kristo sa Ebanghelyo nga ang magmahal sa iyang kinabuhi mawad-an niini apan ang dili mahinugon sa iyang kinabuhi magpatunhay niini alang sa kinabuhing dayon. Ang iyang kamatayon dili kapildihan ug dili kataposan, kondili kadaugan ug sinugdanan sa kinabuhing walay kataposan. Sa iyang pagkamasinugtanon sa pag-antus kita gilingkawas sa kaulipnan sa kamatayon sa sala ug gipabalik kanato ang kinabuhing dayon.

Niining panahon sa kwaresma, giawhag kita sa paghatag bili sa atong kinabuhi. Kini atong mahimo kung andam kita mopili sa mas bililhong buluhaton nga mao ang pagsunod sa balaod sa Ginoo nga iyang gisulat diha sa atong kasing-kasing. Kung atong patuyangan ang atong gusto ug malimot kita sa pagsunod sa kabubot-on sa Ginoo, mahisalaag gayod kita. Magmahay kita sa kaulahian. Apan kung kita modumili sa atong kaugalingong gusto ug mosubay sa dalan nga pagalaktan ni Kristo, maangkon ta ang kinbuhing tunhay. Kung kita mamatay sa atong pagbuot ug motuman sa unsay ipabuhat sa Ginoo, molipang ug molambo ang atong kinabuhi.