Lenten Reflection sa GKK Sta. Cruz

Gipahigayon ang Lent Reflection sa GKK Sta. Cruz sa NHA Buhangin Marso 3, 2018 sa alas 7:00 sa gabii , Milagros Abapo, OMPH parish worker isip facilitator. Kini usa ka kalihukan alang sa Kuwaresma.

Uban sa hiniusang tema sa parokya nga “Nabag-ong mga Alagad Alang sa Bag-ong Pagsangyaw sa Maayong Balita” gisugdan ang Lent Reflection sa Pag-ampo, Pag-awit sa “Hosea”.

Si Danilo Guibone PSL maoy napili nga morepresentar isip usa ka pari. Sa iyahang sinina gitaod ang mga play money mga ginunting nga larawan sa mga babae, kotse, balay ilimnon ug uban pa, mga simbolo sa mga butang nga makababag sa pagtuman sa katungdanan ug pagpangalagad.

Dayon nagpartner ang mga nanambong aron sa paghisgot sa ilang tubag sa pangutanang

1. Unsa man ang imong maayo nga kasinatian sa mga pari o relihiyoso?
2. Unsa man ang dili maayo nga kasinatian sa mga pari o relihiyoso?
3. Unsa man ang nahimong epekto niining mga kasinatian sa imong pagpangalagad?

Human sa duha ka minuto nga panaghisgot adunay upat (4) nga nagshare sa ilang mga tubag. Dayon gipalaluman ni Inday Abapo ang mga tubag uban sa paghatag ug mga documento sa simbahan (Vatican 2, PCP2) nga naghatag ug tubag sa nigawas nga resulta.

Gihisgutan dayon ang pagsaulog sa 2018 Year of the Clergy. Unsa ang upat (4) nga butang nga dapat mahibaloan aron magmalampuson ang pagsaulog.

1. Kahimtang sa materialism, globalization, secularism, culture
2. Tawag. Ang tawag sa bag-ong pagsangyaw base sa kinabuhi ni Hesukristo
3. Papel sa mga pari ug relihiyoso- ang pari isip mga maayong magbalantay, ang mga layko sa ilang makanunayong pag-alagad nga naay gugma. Lisod man pero ug sugdan bisan ug gamay lang pero makanunayon modaghan ra gihapon ang mangalagad.
4. Hagit sa pagsangyaw. Ang hagit sa pagsangyaw nga adunay mapaubsanong pag-alagad, ang pagdasig sa uban nga walay pakapin nga kondisyon.

Isip panapos sa kalihukan giawit ang “Pananagutan” samtang ginakuha sa nanambong ang ilang tanang gibutang ngadto sa Pari/PSL isip simbolo nga nalamdagan na ang nanambong nga dili material nga butang ang importante sa kinabuhi kundili ang pagmahal sa Ginoo ug pag-alagad sa katawhan o isig-kaingon.

Makapahinuklog ang sunod nga panghitabo diin gihugasan sa PSL ang mga tiil sa tulo (3) sa mga nanambong nga miboluntaryo nga magpahugas sa ilang tiil. Kini simbolo nga kung gusto kang mosunod sa Ginoo alagaran gyud nimo ang imong isig-kaingon sama ni Hesukristo nga nianhi sa kalibutan aron sa pag-alagad kanato. (Marieta Comighud | OMPH SoCCom)