Unang pagsaulog sa pista ni Sto. Niño sa parokya sa Mati malampuson

Sa Enero 21, 2018 gipahigayon ang kasaulogan atol sa kapistahan ni Señor Santo Niño nga gidumala sa unang higayon sa parokya ni San Nicolas de Tolentino, Mati Cathedral. Ang kalihukan sa buntag gisugdan sa Santos nga Misa didto sa Katedral nga gipanguluhan ni Fr. Mario Jimenez, DCM. Kini gitambongan sa tanang sakop sa 124 ka GKKs sa parokya.

Sa homiliya ni Fr. Mario, gihatagan ug katin-awan ang katawhan bahin sa gigikanan sa imahe sa Santo Niño. Ang iyang mensahe nagpalawom sa pagtoo sa batang Hesus, hilabi na kadtong mga deboto ni Señor Sto. Niño.

Human sa Misa, gipadayon ang kalihukan didto sa People’s Park, Barangay Sainz, City of Mati. Didto ang katawhan niparada nga misayaw-sayaw sa kalsada, dala-dala nila ang imahen ug makita nga puno gayud sila sa kalipay ug pasalamat sa batang Hesus.

Sa programa sa hapon, naghatag og catechesis si Fr. Edito “Ed” S. Baño, DCM, ang Kura Paroko sa Katedral ug Apostolic Administrator sa Diocese of Mati aron masabtan ang tumong sa Kasaulogan alang sa pagpasidungog sa Sto. Niño. “Kini maoy pista sa kabataan nga angayan dalhon sa ilang ginikanan ngadto sa simbahan kay sila mga pinangga man ni Hesus”, matud pa ni Fr. Ed. Nahisgutan usab niya ang bahin sa “inculturation” diin si Hesus giputos sa nagkalain-laing panapton tungod sa kultura apan ang mopatigbabaw niini mao ang atong pagtoo kay si Hesus mao man ang “Maayong Balita” ug gipahinumduman kita sa paghupot sa hiyas nga masaligon ug mapaubsanon sama sa mga bata. Kini mulambo diha sa kinaugalingon natong pakiglambigit Kaniya pinaagi sa pag-ampo.

Ang napulo ka Sto. Niño GKKs sa parokya maoy nagpasundayag sa “Saulog Dance” nga nakapatandog sa kristohanong kinabuhi sa katawhan, hilabi na sa ilang pagsalig sa Sto. Niño nga maoy tigpanalipod sa mga kasakit ug katalagman. Misalmot usab ang Colegio de San Agustin sa programa diin ang ilang pasundayag maoy nahimong “finale number”.

Ang usa ka adlaw nga kasaulogan nagpadayag ug kahiusahan uban sa pagdayeg ug pasalamat sa Sto. Niño nga maoy inspirasyon sa mga kaparian: sila si Fr. Edito S. Baño, DCM; Fr. Mario Jimenez, DCM; Fr.Candido Saladaga, OSA; ug Rev. Fr. Julius Tubid, OSA. Ug usab mga madre sila si: Sr. Florita Galido, MIC; Sr. Linda Singo, CM; ug Sr. Jacqueline Caligner, CM nga maoy miuban gayod sa mga sakop sa GKKs sa parokya sa San Nicolas de Tolentino Cathedral sa pagsaulog sa maong kapistahan.

Ang yano apan mabolokon ug mahinungdanong kasaulogan nagmalampuson tungod sa hinugpong nga paningkamot sa mga sakop sa Parish Consultative Council (PCC) pinanguluhan ni Mr. Carlos Millan ug gisuportahan usab sa kaparian, labi na sa kura paroko. (Mrs. Linda Mahumot)