Pundok Banay mag-ampo sa pagsaulog sa Alay Kapwa 2018

Pagahimoun sa mga Pundok Banay ang pag-ampo sa tibuok Kasaulogan sa Alay Kapwa 2018.

Kini ang usa sa mga bag-ong gihimo nga buluhaton sa pagsaulog sa Alay Kapwa 2018 nga ilunsad karong unang domingo sa kwaresma, Pebrero 18.

Sumala ni Sr. Ma. Marissa Arado, TDM, coordinator sa Archdiocesan Social Action Center (ASAC) Davao, adunay giandam nga tamdanan aron mahimong giya sa pangulo sa pundok banay sa pagahimoong pag-ampo matag panahon sa ilang panagtapok aron mag-ampo.

Dugang niya nga ang tamdanan kauban ang crucifix, tarpaulin ug sticker sa bote sa love offering maoy gamiton panahon sa panagtapok ug pag-ampo.

Ang dakong porsiyento sa malikom nga pondo gikan sa love offering maadto sa pondo alang sa disaster-preparedness program sa arkidyosesis ug sa matag GKK sa parokya.

Makita sa tamdanan ang balasahon ug ang mga rito sa pag-ampo.

Gilauman nga mamahimong makahuluganon ang pagsaulog sa Alay Kapwa aron magkatapok ug mas mahimong suod ang pundok banay nga gilangkoban sa 10 hangtud 15 ka pamilya diha sa Gagmay’ng Kristohanong Katilingban (GKK).

Makahuluganon usab kining maong kasaulogan sa Alay Kapwa 2018 tungod mao usab kini ang ika-50 nga katuigan sa ASAC Davao nga maoy nagpasiugda sa selebrasyon sa Alay Kapwa dinhi sa Arkidyosesis sa Dabaw.

“Renewed Servant-Leaders for the New Evangelization” ang tema nga gisubay sa Alay Kapwa 2018.