Panaghiusa, kadaugan sa DAVRAA 2018

Gipamahayag ni Catholic Bishops Conference of the Philippines kon CBCP President Davao Archbishop Romulo G. Valles, D.D. nga ang tanang delegado sa Davao Regional Athletic Association kon Davraa 2018, mamahimong magmadaugon, ingon man walay mapilde sa tanan kung, ang mga atleta, ihatag ang tanang makaya arun kini magmalampuson.

Sumala sa ambush interview sa mga tigbalita ngadtu sa arsobispo pagkahuman sa Thanksgiving Mass nga gipanguluhan mismo sa arsobispo sa San Pedro Cathedral niadtong biyernes nga gitambongan sa tanang delegado sa DAVRAA 2018, nga mas maayong isilsil sa alimpatakan sa mga delegado nga ang tumong sa maong patigayon, dili lang sa pagpaugnat sa kusog sa lawas apan lakip na sab ang kasing-kasing ug mas maayong adunay disiplina ang tanan.

Midugang ang arsobispo nga maayo nga ang tanang delegado adunay panaghiusa ilabi na nga gipanghinaot sa leader sa simbahan nga ang panagtapok sa kabataan sa Davao Region dinhi sa Dakbayan, mapuno sa paghinugmaay ug pagmaya.