Kompirma gipahigayon sa Agdao Parish

Nagmaya ug napuno sa pasalamat ang Parokya sa San Antonio de Padua, Agdao, sa nahitabong dakong panagtapok diha sa sulod sa ilang Simbahan, sugod alas 9:00 sa buntag hangtod hapit paniudto gahapon, Pebrero 17. Kapin 800, 12 anyos ang mga edad pataas, ang midawat sa Sakramento sa Kompirma diha sa Santos nga Misa nga gisaulog ni Msgr. Leonardo Vicente, inubanan ni Reberendo Padre Leonie España, kura paroko.

Focus sa pagdawat sa Sakramento ang pahimangno ni Msgr. Vicente diha sa iyang Homiliya. Giubanan niya kini sa pagpahinumdom sa tanang kompirmante nga sila midawat na sa mga gasa gikan sa Ginoo diha sa Bunyag ug nga ila na lang kining palambuon uban sa panabang sa mga ginikanan, ninong ug ninang karon nga madawat nila ang dugang gasa gikan sa Sakramento sa Kompirma. Ang mga ninong ug ninang kinahanglan nga maggikan sa samang katilingban sa bata nga kompirmahanan. “Ang Sakramento sa Kompirma ug Eyukaristiya importante gayud kay kini mag-lig-on sa tawo diha sa iyang pagka-Katoliko, pagka-Kristiyano”, pahinumdom ni Msgr. Vicente.

Dili lang ang bata ang naghinamhinam sa maong pagadawaton nga Kompirma kundili apil ang mga ginikanan.

Sila Dayday ug Biboy, parehas 12 anyos, mibalik-balik sa panimalay sa ilang katekista aron maka-sigurado sa oras aron dili ma-“late.” Mao usab ang nahitabo sa mga inahan, Christine ug Elyn nga nakisayod sa kinahanglan buhaton sa adlaw sa kompirma.

Sa panahon sa Confirmation seminar sa adlaw’ng Dominggo, Enero 4 hangtod Pebrero 11, midugok ang mga bata kauban ang ilang mga ninong ug ninang.

Ang mga school catechists sa San Antonio de Padua Parish madasigon nga mihimo sa ilang tahas sa misyon sa ebanghelisasyon.

Tataw ang ilang pagpaningkamot sa pagdasig sa katawhan sa Dios diha sa mitubag sa panawagan, ang kapin 800 nga na-Kompirmahan. Dakong pasalamat ang gipaabot ni Padre Toto España alang kanila ug sa tanang kabataan nga midawat sa Sakramento sa Kompirma. (Elena Corazon Mozo | Justin Tomale Felicia)