Ika-35 nga kapistahan sa San Pablo Parish gisaulog

Gisaulog sa tibuok Simbahan sa Dabaw ang ika-35 nga kapistahan sa San Pablo Parish niadtong Pebrero 18.

Subay sa tema nga “SAN PABLO: Panig-ingnan sa kabalaan diha sa pagpangalagad sa mga layko uban sa Kaparian ug Relihiyoso,” malipayon nga gisaulog sa parokyano ug deboto ni San Pablo ang kapistahan pinaagi sa Santos nga Misa nga gipangulohan ni Abp. Romulo G. Valles.

Sa iyang homiliya, iyang gihatagan og importansya ang koneksyon sa bunyag sa atong paghandum sa Kwaresma ug ang tinuod nga pagbag-o sa kaugalingon sama ni Saul nga karon ginganlan og San Pablo.

Iya usab gihatagan og eksplanasyon kung nganong sa Pebrero gisaulog sa San Pablo ang maong kapistahan nga sa Liturgical Calendar, January man ang paghandum sa conversion ni Saul, San Pablo karon.

Matud pa niya, ang maong kapistahan nahimong inspirasyon ug Paghandum sa pagduaw ni St. John Paul II niadtong tuig 1981 diri sa dakbayan sa Dabaw.

“If we come to think of it, having this feast in the Season of Lent is so beautiful. The connection of Lent to our fiesta, recalling the conversion of the Great Apostle, Saint Paul,” sumala ni Abp. Valles.

Dugang usab niya nga aron masabtan ang pagsaulog sa Kwaresma, angay balikan ang pagsabot sa bunyag, ang gasa nga nadawat sa matag usa.

“We go through the Season of Lent keeping in mind the gift that we received and that is baptism,” giingon niya ug dugang usab niya nga: “All of this are part of the worthy conduct so that we will act accordingly as citizens of Heaven.”

Giingon usab niya nga ang kinabuhi sa tawo sama sa disyerto diin ang uban gilantaw nga ang kinabuhi sama sa Boracay, Hong Kong kon dili Paris.

Apan giingon niya nga kinahanglan ilhon sa tawo ang iyang pagka-siya ug kumbinsido siya sa iyang pagka-siya nga anak sa Diyos aron dili matintal sa suhol o pagpangilad ni Satanas.

Dugang usab niya nga adunay mga anghel sa palibot nga mutabang sa tawo panahon nga tintalon siya sa yawa.

“Walk as a child of God,” giingon ni Abp. Valles samtang nanghinaut siya nga unta tabangan ang katawhan nga mahisama kay San Pablo nga nausab ang kinaiya ug mibalik sa Ginoo. (Mary Ann Almeria w/ John Frances C. Fuentes)