Hugot nga pagtoo sa mga deboto nakita sa ika-35 nga kapistahan sa Sto. Niño Parish, Kaputian

“Duyog sa Parianon ug Harianong Lungsod sa Pag-Ambahan ug Pagsangyaw kang Sto. Niño diha sa Panaw sa Pagtuo”, mao kini ang tema sa ika-35th Parochial Fiesta ni Sr. Sto. Niño, Kaputian District, Island Garden City of Samal. Malampuson gayod nga gisaulog sa mga parokyano ang maong kapistahan diin adunay nagkadaiyang mga aktibidades ang gipahigayon sa parokya.

Una pa man miabot ang adlaw sa kapistahan, adunay mga pre-activities nga gipahigayon isip preparasyon sa pagsaulog sa kapistahan. Gipahigayon ang Panaw duaw ni Sr. Sto. Niño sa matag GKK nga nahisakop sa parokya. Aduna usab Novena Mass nga gisugdan kaniadtong Enero 12 diin matag distrito ang isponsor sa maong misa.

Kaniadtong Enero 20, 2018, bisperas sa maong kapistahan, gipahigayon ang Fluvial Procession diin iparada ang tanang imahen nga buot dalaon sa mga parokyano sa dagat libot sa Poblacion Kaputian. Gisugdan kini sa pagpanalangin sa tanang Bangka ug lantsa nga muduyog sa maong parada. Gipahigayon sab ang road procession human ang parada sa dagat diin kini gi-sundan sa pagsaulog sa Santos nga misa.

Sa adlaw sa kapistahan, dili maihap ang mga parokyano nga miduyog sa Santos nga Misa isip pagpakita sa ilang hugot nga pagtoo kang Sr. Sto. Niño. Adunay tulo ka misa ang gipahigayun: unang misa – 5:30 A.M., ikaduhang misa – 8:00 A.M. diin gipanguluhan kini ni Arch. Romulo G. Valles, DD., ikatulong misa- 10:00 A.M. nga ang presider mao si Bp. George Rimando, DD.

“Maningkamut kita nga sama sa usa ka bata, kita maglakaw nga masaligon sa atong Diosnong Amahan sa tanang hagit sa tagsa-tagsa nga kinabuhi,” miingon si Archbishop Romulo G. Valles sa iyang homiliya.

Usa sa mga ginahulat sa mga parokyano sa maong kapistahan mao ang unang pagsaulog sa Duyog Sayaw Sangpit nga kaniadto ginatawag nga sinulog. Giusab kini sa parokya tungod ang pulong nga duyog nahimo nga basic foundation sa mga liturgical and paraliturgical activities sa kapistahan sama sa duyog kalingawan, duyog panaw duaw, duyog fluvial procession/ road procession ug ang duyog sayaw sangpit. Ang tumong niini mao nga ipadangat sa katawhan nga ang pista ni Sr. Sto. Nino dili lang pagasaulugon sa mga taga Poblacion Kaputian apan sa tanang 44 nga kapilya, 9 ka mga distrito nga sa sakop sa parokya ug sa tanang mga katawhan nga buot makigduyog sa kapistahan.

Kung kaniadto ang mga distrito lamang nga nahisakop sa parokya ang mamahimong muapil sa Duyog Sayaw Sangpit, karong tuiga, giawhag na sa parokya nga muapil ang eskwelahan sa sa maong panagtigi. Gani, adunay lima ka mga misalmot sa maong kompetesyon. Duha niini sa School category: Kaputian National High School ug Anonang National High School ug Libertad National High School diin ang Anonang National High School ang midaug ug midawat sa premyo. Sa District category usab adunay duha nga miapil: Sion District ug Poblacion Kaputian District. Ang Poblacion Kaputian District maoy midaug sa maong kategorya.