Ang Bukid sa Kaluwasan

Ikaduhang Dominggo sa Kwaresma
Genesis 22:1-2,9,10-13,15-18 / Roma 8:31-34 / Markos 9:2-10

Ang mga panghitabo sa unang pagbasa ug ang ebanghelyo naghisgot ug bukid. Ang unang bukid mao ang kang Abraham diin siya nagmasinugtanon sa Dios. Tungod sa sugo sa Dios, iyang gihalad ang iyang bugtong anak nga si Isaac isip usa ka sakripisyo. Sa pagkamasinugtanon ni Abraham, ang langit naabli diin, napuno siya sa daghang mga grasya. Ang ikaduhang bukid mao ang bukid diin si Jesus nagmasinugtanon sa iyang Amahan nga mahimong usa ka sakripisyo aron ang katawhan mapuno sa grasya sa kaluwasan.

Ang Pagkabag-o sa bayhon ni Jesus nag-andam kaniya ug sa mga apostoles sa makalilisang nga kahimtang sa kamatayon ni Jesus didto sa bUkid sa Kalbaryo. Ang pagpakita ni Moises ug ni Elias naghatag sa lamdag kon unsa ang panghitabo didto sa Bukid. Alang kang Moises, ang Dios mopalingkawas sa iyang katawhang Israel gikan sa kaulipnan sa Ehypto ngadto sa kalingkawasan. Ang kasinatian sa Exudos mismo, nag-larawan nang daan sa mahitabo sa kalbaryo nga kinahanglang mahitabo diin si Jesus nga mao ang Bag-ong Moises-mopalingkawas sa katawhan gikan sa pagka-ulipon sa sala ngadto sa kagawasan. Si Elias sa laing bahin, nahimong ilado isip maisogong profeta kinsa nagmadaugong mibarog sa tumong sa matuod nga Dios sa Israel pinaagi sa pagpakigbatok sa mga taliwas nga mga buhat sa mga gamhanang mga tawo sa ilang katilingban; sa mga bakakong dios-dios ug mga bakakong profeta. Didto sa Kalbaryo, si Jesus mibarog usab batok sa mga koruption nga gibuhat sa mga gamhanang mga tawo sa gobierno, ug gihalad ang iyang kinabuhi agig pagsaksi kon unsa ang pagka-matinud-anon ug pagkamasinugtanon ngadto sa usa ka Dios nga Matuod. Ang Krus ug ang himaya nabugkos isip usa diha sa Kalbaryo- nga mao ang luna sa Pagpadayag sa Dios ug ‘Gahum diha sa Kahuyang’. Sa atong bahin, atong napamalandongan nga ang pagsunod nato sa mga Sugo sa Dios, mag-abli sa langit aron kita mapuno sa grasya nga mahimong balaan, kay hatagan kita sa grasya nga mabansay nato adlaw-adlaw ang mga hiyas nga angayang bansayon sa matag Kristyano, ilabi na ang pagka masinugtanon ug pagpailob. (Sr. Rica Dalaguit, FSP)