Yano nga party pero busog sa kalipay

Nitambong ang mga parokyano sa San Antonio de Padua, Agdao, sa party ni Fr. Toto España niadtong Enero 14 atol sa iyang ika-19 nga anibersaryo sa iyang pagka-pari. Nagbitbit sila sa ilang mga pagkaon nga saluhan diha sa party. Yano gayud ang maong selebrasyon apan sila nabusog sa kalipay sa ilang pakighiusa sa ilang kura paroko ug sa usa’g-usa.

Gipalanog sa pipila nga mga parokyano ang ilang pasalamat kang Fr. Toto kay tungod siya nahimong “pasensyoso, masinabtanon, maluloy-on, nga higala ug amahan,” alang kanila sa sulod sa walo ka tuig. Daghan pa kanila ang gusto mopaambit sa ilang kasinatian ni Fr. Toto apan kini itagana sa sunod nila nga panagtapok, sa iyang ulahing birthday celebration kauban ang mga parokyano sa San Antonio de Padua Parish.

“Manggihatagon gayud ang taga San Antonio, grasya kini sa Ginoo sa parokya,” mabinationg pagpadayag ni Fr. Toto. Nasinati kini niya diha sa major renovation nga nahitabo sa simbahan sa maong parokya. Gikuha ni Fr. Toto ang iyang kusog ug ang resources diha sa iyang mga parokyano aron molampos ang pagpahitabo sa maong kausaban. “Ila usab akong gitabangan sa pag-ila sa akong kaugalingon,” ingon niya.

Pari ug parokya, ang duha ka gasa nga gikan sa Ginoo nga angayan gayud pasalamatan. Malipayong anibersaryo Fr. Toto, gikan sa tibuok parokya sa San Antonio de Padua, Agdao. (Elena Mozo | SAP SoCCom)