Sto. Niño GKK sa Cabantian nagsaulog ug ika-72 nga kapistahan

Gisaulog ang ika-72 nga kapistahan ni Sr. Sto. Niño isip Patron sa GKK Banganga-Countryville-dela Peña, Cabantian diin nahisakop sa Parokya sa St. Mary of the Perpetual Rosary Parish. Tema sa kasaulogan: Sto. Niño: Sumbanan sa Konsagradong Kinabuhi uban sa mga Kaparian ug pagduyog sa mga Katilingban.

Isip pagpangandam sa katilingban sa kapistahan sa mahal nga patron adunay mga aktibidad nga gipahigayon sama sa pagrosaryo, hiniusang pag-ampo ug novena nga nagsugod Enero 6 hangtud Enero 14, 2018 nga gipangulohan sa mga Pangulo sa Liturhiya (PSL) nga nahisakop sa Zone 5.

Ang mga GKK Servant Leaders (GSL) ug mga Tigpasayon sa Pundok Banay (TPB) nga gipangulohan sa GKK Social Action Committee (GSAC) inubanan sa PSK, Zerlyn Alba-Tulibao gisigurong mapahigayon ang Free Medical check-up diin libreng tambal ug bitamina ang gihatag. Natabangan ang 47 ka miembro sa GKK niadtong Enero 13, 2018. Adunay duha (2) ka mga doctors ang mitubag sa maong social services program nga sila Dr. ug Dra. Dela Cerna.

Ang Caritas Davao pinaagi ni Sr. Rose Duhaylungsod maoy pastoral agency partner alang sa libreng tambal, samtang duha ka miembro sa katilingban naghatag sa mga bitamina alang sa mga pasyente. Libre sab ang pagkaon sa mga pasyente, medical team ug volunteers.

Una magsugod ang ika-siyam nga adlaw sa novena niadtong Enero 14, 2018, gipahigayon ang prusisyon sa imahe ni Sr. Sto. Niño alas 4:00 sa hapon palibot sa Countryville ug Dela Peña Village.

Ang Santos nga Misa alang sa kapistahan ni Sr. Sto. Niño gipahigayon Enero 15 sa buntag nga gipangulohan sa Kura Paroko, Fr. Jess Samaniego.

Fun games sama sa parlor games ug basketball games ang misunod nga kalihukan sa paghiusa sa mga miembro sa katilingban. Viva Pit Senyor! (Hermie Mapute, SMPRP SoCCom | Photos: Gliceria Velez)