Paaria kanako ang mga bata

Kapistahan sa Mahal nga Santo Niño
Is. 9:1-6/ Sal. 97:1-6/ Eph. 1:3-6, 15-18/ Mk. 10:13-16

Ang kasaysayan sa pag-abot sa mahal nga Santo Niño sa atong nasud adunay talagsaong importansiya. Ang iyang pagtungha sa dagan sa atong pagtoong Kristohanon nakaangkon ug dili basta-basta nga impluwensiya. Gani daghang mga katilingban labi na Cebu ang dada tuig modugok aron lamang paghatag ug pagsimba sa batang Hesus.

Sa Ebanghelyo, giabog sa mga tinun-an ang mga bata nga buot mosinati ni Hesus. Apan si Hesus miingon “paaria kanako ang mga bata kay ang gingharian sa Dios ila sa mga sama niining mga bata.” Nahisama kaha kita sa mga bata aron kita makasulod usab sa gingharian sa Dios?

Sa ikaduhang pagbasa, si San Pablo nag-ampo nga madugangan ang mga nangandoy sa kaalam ug pagsabot sa mga gipadayag aron mahingpit ang pag-ila sa Dios. Kining pangandoy sa kaalam ug pagsabot, kinaiya sa usa ka bata. Dili ba ang bata dali ra nga matingala, mangutana gayod ug buot makahibalo. Mao gani nga usahay magpunay kita ug buyag nga dili himoon ang pagsaka-kanaog o pagpaduol kung kita nagluto kay basig siya mapasu o pagsundog sa atong gihimo kay tingali siya madisgrasya kay dili pa niya makaya tungod kay siya bata pa. Kining maong kagustohan sa usa ka bata nga makasinati sa tanang butang naglawaran sa iyang pangandoy nga makakat-on, masayod ug makahimo sama sa mga dagku.

Kini usab unta ang atong kinaiya sa natad nga espirituhanon. Maningkamot usab unta kita sa pagkat-on, pagkasayod ug paghimo sa atong pagtoo. Magkalalom unta ang atong pagbati nga makatugkad sa misteryo sa Ginoo ug relasyon sa isigkatawo, ilabina niining bulan sa Bibliya nga naghagit kanato sa pagbasa, pagtuon, pag-ampo, pagpaambit ug pagpuyo sa pulong sa Ginoo.

Sa unang pagbasa gikan ni Propeta Isaias, kita unta mapuno sa kahayag ug pagmaya. Ang pagkasayod ug paghimo sa mas lalom nga pagtoo magdala kanato sa pagkagaan sa yugo nga atong gipas-an kay uban man kanato ang “Maalamong Magtatambag”, ang “Prinsepe sa Pakigdait.” Busa, sama sa usa ka bata, mahingangha ug matingalaa unta kita kanunay sa mga pagtulon-an sa Inahang Simbahan ug moduol kanunay sa Dios.