Hiniusang tabang alang sa biktima sa bagyong Vinta

Labaw nga nasinati ang diwa sa Pasko pinaagi sa paghalad sa kinabuhi, panahon ug bahandi sa mga parish leaders, parish staff, GKK Servant Leaders (GSL) ug nagkalain-laing volunteers sa matag ministriya sa Parokya sa St. Mary of the Perpetual Rosary uban ang Kura Paroko, Fr. Jess Samaniego ug Msgr. Max Sarno. Mao kini ang kasinatian sa tanan sa dihang nagkahiusa sa hinanaling pagtabang sama sa pagkaon ug personal nga mga gamit alang sa mga biktima sa bagyo nga Vinta niadtong Disyembre 23, 2017 diin adunay walo (8) ka Gagmay’ng Kristohanong Katilingban (GKK) sa Tigatto area nga nahisakop sa parokya sa St. Mary of the Perpetual Rosary. Ang walo ka GKK mao ang (1) San Vicente Ferrer, Uyanguren (2) Birhen sa Lourdes, Relocation (3) San Vicente Ferrer, Sta. Marina (4) Sto. Niño, Uyanguren (5) Sto. Niño, Lapanday (6) San Isidro Labrador, Uyanguren (7) San Isidro Labrador, Juliville (8) St. Joseph, Jade Valley. Adunay 1,658 ka pamilya nga apektado sa maong bagyo diin ang uban anaa sa upat (4) ka evacuation centers nga nahimutang sa Buhangin Gym, Davao Marine Merchant Academy (DMMA) Gym, Tigatto 8 Gym ug Sto. Niño, Lapanday Chapel.

Nagpadayon ang hinabang sa mga biktima sa bagyong Vinta diin mapasalamaton ang Parish Social Action Ministry (PSAM) nga gipangulohan sa PSAM Coordinator, Jojo Corage ug ang Kura Paroko, Fr. Jess Samaniego sa mga manggihatagon nga mga parokyano, mga higala ug organizations, mga matinabangon nga GKK Servant Leaders ug sa mga naghalad ug pag-ampo alang sa kaluwasan sa mga biktima sa bagyo Vinta. (Hermie Mapute | SMPRP SoCCom)