Unang ‘Diocesan Congress’ gipahigayon sa Mati

MATI CITY — Nagtigom ang mga 1,300 ka mga delegado sa unang diyosesanong kongreso sa mga Gagmay’ng Kristohanong Katilingban (GKK) gikan sa 19 nga mga parokya niadtong 22-24 Nobyembre sa St. Therese Gym, Clergy House compound. Kung giihap lamang ang mga pangulo sa GKK ug representante sa Lay Organizations Movements and Associations (LOMA), mukabat ang mga layko sa 1,098, sumala sa Media Coordinator Erlinda Mahumot. Ang kalihokan gisibo usab sa siyam ka tuig nga ispirituhanong panaw sa bag-ong ebanghelisasyon sa Pilipinas nga matapos sa tuig 2021. Ang tema nga gisunod mao ang tema sa tuig sa parokya nga: “Pagtukod sa Gagmay’ng Kristohanong Katilingban isip Lumilihok sa Kahiusahan sa Pagsalmot ug sa Misyon.”

Ang mga delegado gikan sa mga lagyong parokya ang gipahiluna sa mga ‘foster families’ sa mga parokya sa Mati—ang San Nicolas de Tolentino Cathedral, Divine Mercy, ug Don Bosco. Mitambong ang mga pangulo sa mga GKK, tig-lima ka mga pastoral council members, tanang mga apostolate coordinators, mga representante sa LOMA, ingon man ang mga paring diyosesano ug relihiyoso, ug mga madre ug brothers sa nagkadaiyang kongregasyon. Ang Apostolic Administrator Msgr. Editho S. Baño ang nag-preside sa opening mass samtang si Davao Archbishop Romulo G. Valles D. D. ang main presider sa culminating mass sa 9:00 sa buntag sa San Nicolas de Tolentino Cathedral.

Ang mga detalye ug resulta ang masayran gikan sa media report nga giandam ni Ms. Mahumot. Ang mga assembly resolutions ang magsilbe nga plano o giya sa mga parokya sa ilahang kaugalingong pagtuman sa gikasabutan. Nasayran nga nahilakip usab ang diwa ni Birhen Maria, ang modelo nga disipulo diha sa pagtukod ug katilingban nga abli sa Balaang Espiritu, masalmoton, maakuhon, maloloy-on ug matinabangon sa mga kabus, ug madasigon sa pakig-dayalogo sa mga Kristiyano-Muslim-Lumad aron makab-ut ang kalinaw ug kahiusahan sa Gingharian sa Amahan. Sa katapusang adlaw, gitak-op ang tuig sa parokya ug gilusad ang tuig sa clergy and religious. Niadtong 27 November 2017 nilarga ang upat ka mga delegado gikan sa Mati paingon sa National BEC [GKK] convention sa Bohol.