“San Francisco Xavier, Pari ug Relihiyoso, Atong Modelo Niining Ika-limang Sentenaryo sa Kristiyanismo”

METRO FIESTA 2017

Sulod sa milabay nga kapanahonan, ang atong kasaksihan ang mapadayonang pag-lambo ug pag-tubo sa atong pagtuong Kristohanon. Gisugdan kini sa mga pari ug relihiyosong kastila nga maoy nagpugas sa mga binhi sa atong pagtuo, hangtod sa kasamtangang panahon, kung diin, mapadayonong kining giamoma ug gitagad sa atong mga lokal nga mga kaparian ug relihiyoso. Busa, tataw ug dayag gayod ang lihok sa kamot sa Amahan aron mamahimong mabungahon ang atong simbahan ug pagtuo. Maong tinuod gayod nga kita makaingon nga buhi ang makanunayong nag-tubo ang atong Kristohanong pagtuo.

Apan, subay usab sa paglambo sa atong pagtuo, ang paspas usab nga paglambo ug pag-bag-o sa atong kalibutang gikahimtangan. Ang kaniadtong mga mentalidad nga nagsubay sa kabubut-on sa atong Ginoo, napulihan na ug mga kalibutanong mentalidad nga naka-sentro lamang sa atong kaugalingong gusto ug kabubut-on. Mao nga, kung kaniadto makita nato ang ka abunda sa bokasyon paingon sa pagka pari ug pagka relihiyoso, ug pagka relihiyoso, ug ang kakugi sa pag-tubag sa maong tawag sa Ginoo, ug ang nagka-anam nag kakulang ang mga pastol sa atong simbahan nga mao untay mag-amoma ug mag-giya sa katawhan paingon kang Kristo.

Mao kini karon ang hagit sa atoang tanan, andam ba kita nga musunod sa kabubut-on ug mutubag sa tawag sa atong Makagagahum nga Amahan? Aduna ba kita’y kakugi ug kadasig nga muingon ug “Oo” sa imbitasyon sa atong Ginoo? Mahisama ba kita sa pagka-madasigon ug pag-kamaisog sa atong halandong patron, San Francisco Javier, nga midawat sa hagit sa ebanghelyo ug mi rigso sa iyang kaugalingon aron lang mapakaylap sa ebanghelyo dili na sama sauna. Ang kalibutan karon aduna nay nagkadaiyang nawong aron mahilayo ang katawhan sa Ginoo. Apan, taliwala niing tanang mga hagit ug pagsulay, ang tubag sa imbitasyon sa atong Ginoong Hesukristo, sa pagsunod sa iyang lakang, anaa sa matag-usa kanato. “Andam ba ikaw nga mutubag niini?” (Izan Jacob Nacilla – XACOSE)