Matigsalog: Dili na munaog aron makadawat ug tabang

Si Mrs. Filisa Dangkay, 29 anyos, residente sa Sitio Patag usa lamang sa nagbaklay ug 10 kilometros aron makaabot sa medical mission nga gipahigayon sa ilang barangay. Apan ang iyang kakapuy napulihan ug kalipay tungod kay nakadawat siya ug sayo nga pinaskuhan sama sa tambal, habol, ug ang iyang duha ka anak nalingaw sab sa maong aktibidad.

Si Filisa, usa sa kapin 500 ka residente nga nalipay sa gipahigayong medical ug dental mission sa Lions Club International parkular mente ang Davao City Host, Davao City PAG-ASA, Davao City Capitol, ug Davao City Entrepreneur uban ang Davao City Highlands Ecotourism Association Incorporated sa Barangay Datu Salumay Marilog district, Davao City niadtong Nobyembre 26.

Ang mga residente nakadawat ug libreng check up, tambal, delata, ug habol aron ilang magamit panahon sa katugnaw ilabi na panahon sa inig bundak sa ulan tungod kay ang Marilog usa ka bugnaw nga lugar.

Sumala pa ni Jerlynne Braga, presidente sa Davao City Host Lions Club, ang mga Matigsalog nakadawat sa ilang serbisyong medical lakip na ang mga kabataan nga nakadawat ug espesyal nga regalo sama sa school supplies. Dugang pa niya, ang mga doctor nga misalmot sa maong medical mission wala nagpabayad sa ilang serbisyo nga gihatag.

Gipili nila ang Datu Salumay sa maong kalihukan tungod dili na sila gusto nga ang mga Matigsalog monaug pa sa syudad arun adunay madawat nga serbisyo. Samtang nasayran sa atong pagpanubay nga ang maong pundok, dili lang sa dakbayan sa Davao adunay ginapahigayun nga medical mission tungod aduna na sab silay gipahigayon nga susamang aktibidad kaniadto sa silingang dapit sa syudad. Kining maong medical mission matag tuig ginapahigayon tungod ang misyon sa ilang pundok ang mutabang gayud sa mga kaigsoonang nanginahanglan ilabina sa mga lumad.