Mati dayosis nangandam alang sa Pasko

CITY OF MATI — Panahon nasab para sa laing panagtapok alang sa kaparian, mga relihiyosong sisters ug brothers, ug ang tibuok katawhan sa Diyos sa nahitabong mga kalihokan sa dayosesis. Nagsugod kini sa paghatag ug mga award sa lima ka paring dayosesano nga nagsaulog sa ika-25 nga kasumaran sa ilang pagkapari niining tuiga atol sa DADITAMA Clergy gathering alang sa Year of the Clergy and Consecrated Persons sa Tagum City, niadtong Disyembre 4-5, 2017. Sila si Frs. Carlos Baquial, Nestor Morata, Roberto Ombon, Carmelito Salisad, ug Roland Sayman. Ang nahisgutang mga pari una nang nagsaulog sa ilahang mga presbyteral jubilees sa nagkadaiyang mga parokyang gigikanan o kung asa sila natawo ug midako. Didto sila naghalad sa mga Misa Pasalamat ug gihikayan ug salo-salo sa katawhan. Sa Big 8 Hotel sa Tagum gipahigayon ang dakong panagtigom ubos sa tema: “Renewed Servant Leaders for the New Evangelization.” Sa susamang panghitabo, gihatagan usab si Bishop Emeritus Patricio H. Alo, D.D. sa award nga “53 years in the priesthood, in recognition for his selfless service for the Holy Mother Church.”

Misunod dayon ang quarterly Davao, Digos, Tagum, Mati kon DADITAMA meeting, diin usa ang Mati sa mga misalmot sa katapusang panagtapok sa mga lideres sa upat ka mga dayosesis didto sa Tagum, Disyembre 5-6, 2017.

Malipayon usab ang dayosesis sa pagkakaplag ug tulo ka mga bag-ong pari: sila si Frs. Alfie Alimbon, Raphy Armasa ug Eric Bangcot. Si Arsobispo Romulo G. Valles, D.D. maoy ordaining prelate sa tulo ka mga diyakono niadtong 13 Disyembre 2017. Giordenahang pari si Rev. Alfie Alimbon sa parokya ni San Salvador del Mundo, Caraga;Ssunod adlaw, alas 9:00 sa buntag, dungan nga giordenahan sila Rev. Raphy Armasa ug Eric Bangcot sa parokya ni Sa Ignacio de Loyola sa Luzon, Gov. Generoso. Antes sa priestly ordination, gipahimutang ang tulo sa nagkadaiyang mga parokya alang sa pagpangandam sa seremonyas sa presbyteral ordination. Gibasa usab ang ilahang priestly assignments human sa kasaulogan sa Eukaristiya sa ilang ordenasyon.

Sa mao gihapong adlaw, 14 Disyembre 2017 gisaulog ang ika-33 nga kasumaran sa pundasyon sa Mati dayosis pinaagi sa Santos nga Misa nga gipahigayon sa San Nicolas de Tolentino Cathedral. Si Abp. Valles ang main celebrant, kauban si Bishop Alo ug mga kaparian isip co-presiders. Misunod ang “priests-religious dinner fellowship and Christmas program” nga gipahigayon sa cathedral “rooftop or 5th floor.”