Kinsa man ang Hari nga nagpuyo sa atong kinabuhi karon?

Solemnity of the Epiphany of the Lord
Is 60:1-6/ Eph 3:2-3, 5-6/ Mt 2:1-12

Sa atong pagsaulog sa Domingo sa Epipaniya, gipadayag ang mensahe nga naghisgot sa duha ka matang sa tawo’ng nangita kang Jesus. Ang una mao ang mga makinaadmanon ug ang ikaduha mao ang mga pariseo ug mga scriba.

Ang makinaadmanon, isip mga makinaadmanon, dili man kinahanglan nga sila mga hari gayud, kondili mga tawo nga adunay kinaadman. Giila sila nga taga Persia (karon Iran) ug Arabia, diin ang mga tawo giila sa pagbasa sa mga timaan sa kalangitan, ilabi na sa mga bitoon. Pagkahibalo nila sa gisugyot sa bitoon nga adunay batang matawo kinsa mamahimong Hari sa mga Judeo, milangyaw sila sa halayong dapit aron pangitaon kini. Inubanan sa ilang nabasahang timaan sa mga bitoon, nangutana pa gani sila sa mga banggiitan sa Kasulatan didto sa Judea; Tungod kay labaw sa tanan naghupot sila sa usa lamang ka tumong. Kana mao ang pagsimba kaniya nga hari sa mga Judeo, busa nangandam sila ug tulo ka gasa nga nagpadayag kon unsang matang sa bata ang ilang bisitahan. Mga simbolo sa kamatuoran: bulawan-pagkahari ni Jesus; mira-makaluwas nga kamatayon; ug ang incenso-paghalad isip Dios. Sila gipanalanginan nga makakita kang Jesus didto sa pasungan.

Ang ikaduhang matang sa tawong nangita kang Jesus, mao ang mga pariseo ug mga scriba. Pinaagi sa pagbasa sa kasulatan, ilang nakit-an kon asa ang luna diin ang bag-ong natawong hari, gipanganak, apan ang tumong nila mao ang pagsunod lamang sa sugo sa ilang hari nga si Herodes. Aduna ba silay gasa ngadto kang Jesus? Wala, tungod kay ang ilang tumong mao lamang ang pagpaniid ug pagsugilon ngadto sa Hari kon asa ang batang hari nga natawo. Ug tungod kay ang hari naghupot ug kayugot ngadto sa bata, mao usab ang tumong sa mga Scriba ug mga Pariseo. Nakit-an ba nila ang bata? Wala usab, tungod kay ang ilang katuyuan nahilayo sa kabubut-on sa Dios.

Alang kanato: Gipangita ba nato adlaw-adlaw ang tinuod nga hari nga angayan natong simbahon ug pasalamatan? Siya ang Bitoon, ang Pulong nga nahimong Tawo. Unsa may atong tumong sa pagpangita sa Matuod nga Hari? Ang tumong ba nato, nahisama sa mga Makinaadmanon o sa mga Pariseo ug mga Scriba? (Sr. Rica Dalaguit, DSP)