Kalipay ug pagsalig, dili kahadlok ug kalibog

Ikaupat nga Domingo sa Adbiyento
2 Sam. 7:1-5, 8-12, 14-16/ Rom. 16:25-27/ Lk. 1:26-38

Daghang mga kahadlok atong masinati matag karon ug unya. Mahadlok ta kung ngitngit. Mahadlok ta kung kusog ang ulan kay basin mobaha. Mahadlok ta maoperahan kung masakit. Mahadlok ta mamatay.

Daghan usab mga kalibog atong masinati. Malibog ta unsa man gyud ang gusto sa tawo, init ba o ulan, kay moreklamo ta kung wala nay ulan-ulan apan moreklamo pud ta kung sige lang ulan. Malibog ta pila gyud ang gikinahanglan kay kung dili ta hatagan ug bonus o pinaskuhan, magbagulbol apan kung hatagan, moreklamo gihapon nga gamay ra ang gihatag. Kung dili ka mohatag sa nanaygon dunay reklamo, apan kung mohatag pud ka magamay man o daku, magbagulbol gihapon.

Ang mahal nga Birhen Maria nakasinati usab ug daghang mga kahadlok ug kalibog. Nahadlok siya pag-abot sa anghel. Nahadlok siya kung mahimo ba niya ang dakung tahas sa pagka-inahan sa Manluluwas. Ug nalibog siya unsaon pagkahimo sa gisulti sa anghel. Nalibog siya nganong siya man ang gipili sa Dios Amahan.

Apan luyo niining tanan, nagpasulabi ang kalipay ug pagsalig ni Maria. Midaug ang kalipay niya isip gipili sa Dios ug mipatigbabaw ang pagsalig niya nga mahitabo gayud diha kaniya ang plano sa Dios sumala sa gisulti sa anghel kaniya. Mao nga mitubag siya, “matuman dinhi kanako ang imong gisulti.”

Sama sa gihimo sa Ginoo kang David diha sa unang pagbasa, gipili kita niya, gipanalipdan ug gipanalanginan kita niya. Iiway kita niya sa pagkaalaot ug papuy-on sa iyang palasyo. Malipay unta kita kanunay nga mahimamat ang Ginoo niining balay alampoanan diin siya atong mahimamat ug mapasalamatan sa iyang mga hatag.

Daygon gayod ang Ginoo sumala sa ikaduhang pagbasa tungod kay gipaklaro na niya ang tanan. Iyang gipadayag ug gipaila nga siya gayod ang Ginoo nga nahigugma ug nagluwas kanato. Magkinaunsa man maania na ang Ginoo nga mag-uban kanato. Kung ang pagsalig kaniya lig-on, walay modaug nga kalibog o kahadlok.

Niining pag-abot sa atong Manluluwas, wagtangon ta ang tanang kalibog ug kahadlok ug ipatigbabaw ta ang kalipay ug pagsalig!