Hagit ug gambalay sa GKK gipalawman

MATI CITY — Makasaysayan ang labing unang diyosesanong kongreso sa mga Gagmay’ng Kristohanong Katilingban (GKK) nga nahitabo sa St. Therese Gym, Clergy House Compound, Madang, Mati City sa wala pa matapos ang bulan sa Nobyembre.

Sa unang adlaw, gisaulog ang Misa ni Apostolic Administrator Msgr. Edito S. Baño ug gihimo ang konsagrasyon sa Maputli nga Kasingkasing ni Birhen Maria, lakip ang pag-ampo alang sa mga gipanglutos nga mga Kristiyano. Misunod ang pagpa-ila sa 1,098 nga mga layko nga delegado ug 200 nga mga representante gikan sa managlahing mga relihiyosong pundok ug apostolado. Gibasa ni Mr. Ednar Dayanghirang ang mensahe ni Gobernador Nelson Dayanghirang nga naghisgot sa prinsipyo sa “inclusive growth” sa panggamhanan nga nag-ila ug nakigduyog usab sa mapalamboon nga tahas sa GKK sa pagtubag sa mga tawhanong panginahanglan sa mga kabus ug pagpanalipod sa kinaiyahan ug mga yutang kabilin. Sa opening message ni Msgr. Baño gipasabot ang mahinungdanong buhat sa mga parokya ubos sa hiniusang bikaryato sa SIBALUMATA samtang gihulagway niya ang kamugnaan sa Diocese of Mati ug ang papel sa kaabag ug mga GKK sa pagpadayon sa misyon ni Hesukristo diha sa pagpalig-on sa PAGTUO ug pagmugna ug matuod nga kristohanong katilingban. Nagpasundayag ug kalingawang musical ang mga grupo sa mag-aawit ug magsasayaw gikan sa IHMA, Dawan ug Matiao high schools, DOSCST, ug ang diocesan choir.

Sa ikaduha nga adlaw, nagpulong ang Executive Secretary sa CBCP BEC committee – Fr. Amado L. Picardal, CSsR (Redemptorist). Gisulti niya nga “ang parokya ang kahiusahan sa katilingban, ug angay tutukan ang kalidad sa kinabuhi ug ang partisipasyon sa katawhan diha sa ilang pakighiusa or communion sa upat ka aspeto: communion of heart and mind, communion of word and faith, communion of the table, and communion of goods.” Gisaysay usab ni Picardal ang “perspective” sa simbahan pinasubay sa Batikano II isip komunyon ug katawhan sa Diyos (propeta, parianon, ug harianon). Dugang gipasabot niya ang tahas sa simbahan sa kalibutan sa lainlaing natad: ispirituhanon, moral, kultural, ekolohikal, sa ekonomiya ug politika. Gipasabot niya ang katungdanan sa hirarkiya ug sa layko nga kinahanglan magtambayongay gayud labi na sa mga buhat pastoral. Human sa pakigpulong sa bisitang dinapit, adunay mga reaksyon nga gipatumaw sa mga piniling lideres sa GKK.

Sa hapon, gihisgutan ang hulagway, kahulugan, kinaiya, kahiusahan, hagit ug gambalay sa GKK pinasubay sa PCP II. Mga aspeto nga giklaro mao ang pagkamiyembro niini sa parokya isip lokal nga komunidad sulod sa barangay, sitio, ug purok, samtang ang LOMA (lay organizations, movements, apostolates) dili GKK. Kini usa ka gamay nga katilingban sa mga kristiyanos, nga sagad kapamilya lamang. Ang lima ka kinaiya sa GKK mao ang: (1) panaghiusang katilingban, (2) pulong sa Diyos nga gipamati, gituman ug gisangyaw, (3) pag-ampo sa pagsaulog, (4) paglihok nga hiniusa, (5) pag-apil ug pagdapig sa kabus. Lima usab ang mga hagit diha sa: paghiusa, ebanghelisasyon, katilingbanong pagpalambo sa pagtuo, bag-ong ebanghelisasyon, ug mobilisasyon. Ang gambalay sa GKK mao ang “konseho sa mga lideres nga mopahitabo sa pagsimba, edukasyon ug serbisyo diha sa matag pamilya, labi na gayud kadtong mga dili aktibo sa mga kalihokan sa GKK. Ang afternoon session natapos sa kasaulogan sa Eukaristiya.

Sa ikatulo ug katapusan nga adlaw, gisaulog ang Culminating Mass ug send-off ceremony sa San Nicolas de Tolentino Cathedral, sa pagpanguna ni Msgr. Baño, ug gilusad ang “Year of the Clergy and Consecrated Persons.” Gipahiluna usab ang mga group pictorials. Mga alas 10:30AM namauli ang tanan. Mapasalamaton usab ang mga delegado gikan sa mga lagyong parokya sa pagkasagop kanila sa mga ‘foster families’ gikan sa mga parokya sa Mati—ang San Nicolas de Tolentino Cathedral, Divine Mercy, ug Don Bosco. Ang mga assembly resolutions ang magsilbe nga plano o giya sa 19 nga mga parokya sa ilahang kaugalingong pagtuman sa gikasabutan sa Kongreso. (Erlinda Mahumot)