Gikan sa kawayan–kapilya namugna

Dako ang pasalamat ni Nanay Victoria Jeminez, pangulo sa GKK Sta. Cecilia tungod kay ang ilang GKK nga gikan sa kawayan nagka-anam-anam ug kasemento, ug kini iyang napadayag atol sa ilang kapistahan niadtong Nobyembre 18.

“Nagpasalamat ko sa kura paruko, kang Fr. Jemasol Ortiz, sa iyang tabang sa pag renovate sa GKK Sta. Cecilia, sa mga myembro, mga nagdonate, ug nagtabang sa paglambo sa GKK gikan sa kawayan hantod kini na semento,” sumala pa ni Nanay Jeminez.

Si Rodolfo Cajera Sr. usa ka pangulo sa liturhiya sa maong GKK, mapasalamaton sab labi na sa PSL zone 10 sa pagpagamit sa sound system ug labi na kay Armando Luisen nga kauban niya pirmi panahon sa novena hangtod sa fiesta.

Si Bro. Mark Kiem, bag-ong seminarian nga na assign sa San Roque Parish Malabog maoy naghatag ug pagpaambit mahitungod sa kinabuhi ni Santa Cecilia nga usa ka musikero, maampoon, ug ang tanang anaa ka niya gihalad ngadto sa atong Ginoo.

Gisunod ang pagbunyag, diin dako ilang kalipay kay nakadawat na ilang anak sa sakramento sa bunyag ug sunod magpakasal na sila sa libreng kasalan sa parokya karong Pebrero.

Kini na ang ika-28 nga kapistahan sa GKK Santa Cecilia zone 10, San Roque Parish Malabog. (Imelda Overiz | SRP SoCCom)