Dili pamilya, apan mibisita

Daghang mga binilanggo ang wala ginabisita sa ilang pamilya maong ang mga katekista sa Parokya ni St. Francis of Assisi, Maa mibisita sa Davao City Jail, Annex aron maghatag ug mga pamasko sa mga bilanggo nga labing kabus ug wala nabisitahan ug gikalimtan.

Ang mga katekista personal nga mitunol ngadto sa inmate sa mga hinabang sama sa sabon, toothpaste, toothbrush, shampoo, ug pagkaon nga gikan sa mga parokyano sa Maa. Dungan sa pagbisita sa mga katekista mao ang pagpanaygon sa PREX Maa Band nga nag-ambit ug ang mga sadya nga awit inubanan sa pagsayaw ug sa ‘praise and worship’ diin kini nakalingaw kaayo sa mga detainees ug sa ilang pamilya.

Si Sr. Marlene Sitoy, WCW, maoy nangulo sa maong aktibidad miingon nga, “mobalik mi pagbisita aron mohatag ug mga regalo alang sa “wish list” sa duol 100 ka mga bilanggo.”

Ang Annex Jail mao ang lugar alang sa mga edaran ug mga masakiton nga detainees samtang naghulat sila nga mahusay ang ilang mga kaso. Sa kasamtangan adunay 690 ka mga bilanggo dinhi diin 75% sa mga kaso nahilambigit sa druga. Nag-agwanta sila sa lainlaing mga sakit sa lawas sama sa Tuberculosis, highblood, arthritis, anemia, ulcer, mga sakit sa panit, ug uban pang sakit nga kasagaran makuha tungod sa kadasok sa mga selda. Kadaghanan adunay diperensya sa ngipon ug mata. Ang pinakagrabeng sakit ug lisod tambalan mao ang ilang giantus nga kahidlaw sa mga pamilya labi na gayud kay umaabot na ang Pasko. Dako ang tabang kung adunay moduaw kanila karong panahona aron mabati usab nila ang gugma ni Kristo. (Marian Carmela Raquel | ACPW Volunteer)