Birthday sa obispo ug 25th TCTV founding anniversary gisaulog

MATI CITY — Doble ang selebrasyon nga gisaulog sa katawhan sa Mati ug mga kasapi sa Trinity Cable Television (TCTV) Network niadtong ika-02 Disyembre 2017. Kini ang ika-78 nga adlaw’ng natawhan ni Bishop Emeritus Patricio “Pat” H. Alo, D.D. ug ang ika-25 nga kasumaran sa pagkatukod sa TCTV ubos sa pagpanag-iya ug pagdumala sa Obispo.

Sa birthday celebration, gipahigayon ang tradisyunal nga mañanita alas 5:00 sa kaadlawon sa retirement home ni Bp. Pat sa pagpanguna sa mga sakop sa Holy Name Society. Adunay painit ug mga pagkolokabildo sa mga madre ug layko, lakip ang duha ka igsuon ni bishop, nga sila si Sr. Marietta, OND gikan sa Cotabato ug Dra. Carmencita “Chit” Alo-Studdart gikan sa UK. Misunod sa 8:00 A.M ang kasaulogan sa Eukaristiya sa Divine Mercy Shrine and Parish nga gi-preside ni Bp. Pat kauban si Apostolic Administrator Msgr. Edito S. Baño ug laing 13 ka mga sakop sa diocesan ug religious clergy, ug si Deacon Raffy M. Armasa kansang priestly ordination uban nila Rev. Alfie B. Alimbon ug Eric L. Bangcot ang gikatakda karong 13-14 Disyembre 2017 sa nagkadaiyang mga parokya ubos sa mga kamot ni Archbishop Romulo G. Valles, D.D.

Sa iyang wali, gipasalamatan sa Obispo ang Ginoo sa mga grasya sa iyang bokasyon, ang iyang pamilya ug ang katawhan sa Diyos sa Mati nga mitabang sa iyang pagtuman sa iyang misyon isip mapaubsanong sulugoon sa Diyos. Gilakip usab ni Bp. Pat ang pagpasalamat sa Ginoo sa paglambo sa TCTV, ingon man ang katukuran sa duha ka Katolikong sibyahanan sa radyo—DXHM ug Spirit FM, nga nahimong kusog nga mga kahimanan sa broadcast media alang sa ebanghelisasyon.

Duha ka tradisyunal nga outreach ang gipahitabo human sa Santos nga Misa: ang pagduaw sa mga piniriso ug paghatag kanilag paniudto, ug pagpakaon usab sa gatusan nga mga kabus sa entrance sa Clergy compound. Sa Provincial Jail & Rehabilition Center giawit sa koro sa mga piniriso ang pamaskong mga awit. Nagpasalamat usab si obispo ug pinaagi ni Sr. Melvin P. Manligoy, CSJ, gisaaran nga regalohan sila sa ilang gikinahanglan nga bag-ong gitara ug mga bola sa basketball ug volleyball.

Ang main event nahitabo sa St. Therese Gym, kun diin nagtapok ang dakong komunidad sa TCTV, mga dinapit nga guests gikan sa simbahan, panggamhanan, military, sibikong sector ug media, ug ang bag-ong regional director sa National Telecommunications Commission—Hon. Nelson T. Cañete. Madasigong miluwat ug mensahe si Cañete kabahin sa buhat sa pagdisiplina ngadto sa mga masaypanong tawo sa media, ug ang uban magpupulong gitawag ni Fr. Edilberto “Loloy” R. Mahinay, ang program host, sama nila: Fr. Robert Ombon para sa pag-ampo, Fr. Nestor Morata nga mihulagway kang Bp. Pat isip “man of communication,” Dr. Chit Alo para sa Pamilya Alo nga andam mosuporta sa mga relihiyosong paningkamot sa iyang igsuon, former Governors Rosie Lopez ug Ma. Elena Palma Gil, Commander sa 701st Infantry Brigade, Brigadier General Reuben Basiao, ug si TV-CEO Sr. Melvin P. Manligoy, CSJ, kinsa mihatag ug hamubong kasaysayan sa pagkatukod sa tv network, unya sa ngalan sa network administration gibutyag niya ang paglusad sa TCTV Network digital expansion or internet service sa Pebrero sa tuig 2018. Sa iyang bahin, si Bp. Pat misubli pagpasalamat sa tanan, sa mga panalangin sa Diyos, ug giduot ang nahiunang katuyuan sa TCTV nga mao ang pagbuntog sa kangitngit sa kadautan pinaagi sa kahayag sa pulong sa Diyos—ang modernong ebanghelisasyon.

Mga kalingawang musikal ang gidalit sa Boys’ ug Girls’ Groups sa TCTV sa ilang mixed modern hip-hop, samtang nagtugtog ang Kamagong Band sa PHL Army ug giawit sa ilang singers ang mga paboritong “old hits” ni Bp. Pat ug ubang mga bisita.