Kapistahan sa Kristong Hari Saulogon

Ang mga abtik nga GKK Servant Leaders (GSL) nagpahigayon ug pre-fiesta assembly sa GKK Christ the King Bread Village, Buhangin, niadtong Nobyembre 10, 2017 isip pagpangandam sa kapistahan sa Kristong Hari karong November 26, 2017. Ang tema: “Kaparian ug mga Relihiyoso: Gasa sa Pagkabalaan, Magsasangyaw ug Magbalantay sa Katilingban nga Tinukod ni Kristo.”

Ang asembliya gipangulohan sa Pangulo sa Katilingban (PSK) nga si Maria Patricia Boyano ug gipangandaman sa mga kauban nga mga GKK Servant Leaders (GSL) ug Tigpasayon Pundok Banay (TPB). Gitambungan kini sa mga miyembro sa Katilingban, mga pangulo sa GKK nga sakop sa maong sona ug Parish Pastoral Team diin nagpaambit ang matag parish coordinator sa mga impormasyon ug mga giya sa GKK nga makatabang sa ilang kahibalo isip miyembro sa maong katilingban.

Gipahibalo sa PSK ang mga kalihukan ug aktibidades sa pagsaulog sa kapistahan sa Kristong Hari diin nagsugod ang Hiniusang Pag-ampo ug nobena niadtong Nobyembre 16 hangtud sa November 24, 2017 sa alas siete sa gabii. Ipahigayon ang prosisyon sa Nobyembre 24, 2017 sa alas cuatro sa hapon. Sa November 25, 2017 sa alas singko sa buntag pagahimoon ang “zumba for a cause” diin ang matigom nga salapi gamiton sa mga nakahan-ay nga proyekto sa kapilya.

Saulogon ang Santos nga Misa sa Sabado, Nobyembre 25, 2017 sa alas siete sa gabii nga pangulohan ni Msgr. Max Sarno. Sa adlaw’ng kapistahan, Nobyembre 26, 2017 adunay mga nakahan-ay nga aktibidades nga gi-andam sa Civic Youth Leaders sama sa padula sa mga bata ug hamtong pinaagi niini masinati ang kahiusahan sa matag miyembro sa Katilingban. Ang mga kalihukan nga gipahigayon gipahinungod kay Kristong Hari, ang mismong Hari nga nagluwas sa katawhan, ug kini maoy angay nga himoong sumbanan sa pagsaulog sa Iyang Kapistahan. (Maria Teresa Lanceta Amor, SMPR GKK SoCCom)