Kabatan-onan: Adik kang Kristo

Ang mamahimong adik kang Kristo, mao ang gihatagan ug duso sa guest speaker nga si Bro. Michael Angelo Nisnisan sa gipahigayon nga Youth Camp sa mga kabatan-onan sakop sa Virgen De Los Remedios Parish, Crossing Bayabas Toril, District 5-Zone 9 ug 10 niadtong Oktubre 28-29, 2017 sa Gasco Elementary School, Bato Toril niining siyudad sa Dabaw.

Kapin 60 ang mga delegado nga nisalmot gikan sa walo ka GKK sa Distrito 5 nga mao ang — GKK San Ramon Upper Kilate, GKK San Isidro Labrador Proper Kilate, GKK San Vicente Ferrer Lower Kilate, Sta. Cruz Lower Kilate, San Agustin Ramihan, San Miguel Banas II, San Agustin Banas I ug Sto. Niño Yolanda Farms Bato.

Giniyahan sa tema nga nagkanayon, “Ang Batan-on nga Nagkahiusa, Kalig-on sa Parokya.” Klase-klaseng aktibidad ug panahon sa pagpamalandong ang gipadangat aron makab-ot ang tumong sa maong Youth Camp nga mao ang pagpahinumdom sa mga kabatan-onan unsa ka mahinungdanon ang paggahin ug panahon sa parokya o sa nagkadaiyang kapilya.

Gipangunahan sa Kasaulogan sa Pulong nga gipanguluhan ni Bro. Rodel Cabahug, PSL Coordinator sa District 5, nga nagsilbing pagpangandam una magsugod ang kalihokan. Si Bro. Cabahug usab nagpaabot sa mensahe gikan sa kura-paruko Rev. Fr. Johnny A. Autida nga mapasalamaton sa mga batan-on nga nakahuna-huna ug inisyatibo sa pagpangita ug pamaagi alang sa kaayuhan sa ministriya.

Wala usab nagpapugong ang mga batan-on sa pagpadayon sa “Youth Night – Saint Look-alike Contest” bisan pa man sa makusog nga ulan ug pagkawala sa kuryente. Sa sulod sa duha ka oras nga pagpangandam sa nagkadaiyang grupo sa paglarawan sa mga Santos ug pagtuon sa kinabuhi niini, malipayong ni presenta ang walo ka representante nga naghatag ug pagtulon-an pinaagi sa pagtubag sa mga pangutana mahitungod sa mabungahong kinabuhi sa mga Santos.

Napamatud-an usab ang panaghiusa sa mga batan-on pinaagi sa mga challenges sa Team Building Activity nga gipahigayon sa katapusang adlaw sa Camp.

Matag tuig, ginapahigayon kining maong youth camp alang sa mga batan-on. Gibuhat kining maong aktibidad alang sa pagpahinumdom sa mga batan-on sa paggahin ug panahon sa Simbahan. Isip usa ka pamaagi sab aron mahibaw-an ang mga rason sa kabatan-onan, ginapahigayon ang us aka survey aron makatubag sa pangutana sa mga GKK nganong dili man gayud makasimba ang mga batan-on, ug aron kini mapangitaan ug kasulbaran. (ANSEN | VDLR Youth)