GKK sa Eden nag-abli ug Food Bank

Gagmay’ng Kristohanong Katilingban ang tawag sa atong mga kapilya dinhi sa Dabaw, apan p’wede sab tawgon nga Dakong Kristohanong Katilingban, tungod sa kadako sa gugma sa mga miyembro niini nga kabus.

Diha sa San Miguel Arkanghel GKK nga nahisakop sa parokya sa Virgen Delos Remedios, Toril namugna ang “Foodbank for the Poor” diin kini opisyal nga giablihan niadtong Oktobre 29 uban sa mga miyembro sa GKK ug mga benepisyaryo sa maong proyekto.

Gilangkuban ug 500 nga myembro, ang katilingban nga makita atbang sa Eden Resort sa Toril naningkamot nga makatabang sa ilang mga miyembro nga kabus.

Ang chaplain nga si Fr. Jeus Jardin nalipay sa kaabtik sa iyang mga miyembro nga andam mamintura sa maong luna, “di gyud maglabad imong ulo tungod sa ilang kaabtik dinhi.”

Dugang niya, “dili ko gusto ug tabangan silag 100%, maayo ning naa silay counterpart, it is also for their own dignity nga dili sila makaingon ug ‘pirmi nalang man mi tabangan ani, ulaw naman’ at least ma-feel nila nga pag magpalit sila makaingon sila nga ‘ah, naa gayud koy counterpart,’ nindot manang ing-ana.”

Ang pagpili nila sa mga benepisyaryo gipaagi ug usa ka survey.

“Niagi siya ug point system, gi-consider namo ang family income, kung gamay adunay puntos, pila ka miyembro sa pamilya, mga ing-ana, ug nagpatabang pud mi sa barangay sa data nga kinahanglan alang sa pagpili sa 15 ka benepisyaryo,” sigon pa ni Fr. Jardin.

Ang maong Food Bank dili usa ka negosyo. “Kini gibuhat alang sa pagtabang gamay sa Simbahan kanila. Kung ang baligya sa bugas sa gawas 50, amo kining ihatag nga ‘half-price’ tungod kay ang paninguha lang gayud namo nga makakaon sila nga aduna silay ‘counterpart’ sa ilang gikaon, tungod kay nagbayad man sila.” Ang maong negosyo usa gayud ka palugi nga negosyo, tungod kay murag ang nagbayad sa katunga sa ilang gipalit, mao man ang Simbahan, ug katunga ang mga benepisyaryo.

Ang ilang GKK Secretary nga si Metodia Tagala nag-ingon sab nga paspas nabuhat ang maong proyekto. Pinaagi sab kuno ni sa mga manggihatagon nga mga donor ug sponsor apil ang porsyento nga ginakuha nila sa halad.

“Pasalamat mi kay aduna gayud andam musuporta sa amo, aduna gayud mi mga kanunay nga donors sa among proyekto,” matud ni Tagala.

Ang maong GKK naninguha nga mapadayon kini pinaagi sa mga manggihatagon nga miyembro. Kini ang kinaunhang food bank nga nahimo sa maong GKK sukad paglingkod ni Fr. Jeus niadtong Setyembre niining tuiga.